दोन लिपिकांना कारणे दाखवा नोटीस

सीईओंच्या आदेशाची अवहेलनाप्रकरणी जळगाव जामोद पंचायत समितीच्या शिक्षण विभागातील दोन लिपिकांना कारणे दाखवा नोटीस.

जळगाव जामोद (जि. बुलडाणा): : जळगाव जामोद पंचायत समितीच्या शिक्षण विभागातील दोन लिपिकांनी मुख्य कार्यकारी अधिकारी व गटशिक्षणाधिकारी यांचे आसलगाव केंद्रप्रमुखांना सादर करावयाचे आदेश त्यांना अधिकृतपणे न देता अनधिकृतरीत्या पाच दिवस कार्यालयाबाहेर ठेवले. या प्रकरणात लिपिकांना कारणे दाखवा नोटीस बजावण्यात आली असून, वरिष्ठ लिपिकाचाही यात सहभाग आहे का, याचा शोध घेतला जात आहे. याप्रकरणी कारवाई करण्यात यावी, अशी मागणी माहिती अधिकार कार्यकर्ता महासंघाचे राज्य कार्यकारणी सदस्य दि. रा. भालतडक यांनी केली आहे. याबाबत त्यांनी निवेदनही दिले. निवेदनात नमूद केले आहे की, शाळेच्या कार्यालयात मुख्याध्यापक विजय गारमोडे यांच्या आत्महत्येच्या प्रकरणात निलंबित झालेले केंद्रप्रमुख तथा प्रभारी शिक्षणविस्तार अधिकारी दि. रा. देशमुख यांना पुनस्र्थापना देताना शासननिर्णय डवलून तत्कालीन मुख्य कार्यकारी अधिकार्‍यांनी आसलगाव केंद्रावर पुन्हा पदस्थापना दिली. त्यामुळे महाराष्ट्र राज्य प्राथमिक शिक्षक संघ व मृत मुख्याध्यापकाच्या पत्नीने दि.रा. देशमुख यांची पदस्थापना जळगाव पंचायत समितीव्यतिरिक्त अन्य पंचायत समितीमध्ये देण्यात यावी, अशी मागणी केली तसेच माहिती अधिकार कार्यकर्ता महासंघाचे राज्य कार्यकारिणी सदस्य दि.रा. भालतडक यांनी लोकायुक्ताकडे याबाबत तक्रार केली. त्यानंतर बुलडाणाचे मुख्य कार्यकारी अधिकार्‍यांनी दि.रा. देशमुख यांची पदस्थापना सोनाळा (ता. संग्रामपूर) येथे २९ ऑगस्ट २0१५ च्या आदेशान्वये केली. या जागी रुजू होण्यासाठी देशमुख यांना २१ ऑगस्ट रोजी कार्यमुक्त करणारा आदेशही निर्गमित झाला; परंतु शिक्षण विभागातील लिपिक सचिन घिवे व वरिष्ठ सहायक श्रीकांत जोशी यांनी हे दोन्ही आदेश संबंधितांकडे अधिकृतरीत्या पोहोचू दिले नाही. त्यामुळे त्यांच्यावर कारवाई करण्याची मागणी भालतडक यांनी मुख्य कार्यकारी अधिकारी व गटशिक्षणाधिकारी यांच्याकडे सोमवारी केली.