मेहकर : स्थानिक नगरपरिषदेने दिलेल्या घरकुलामध्ये कोणत्याच प्रकारची सुविधा नसल्याने एका लाभार्थ्याने घरकुलाच्या परिसरातील अपूर्ण बांधकाम असलेल्या १३० फूट उंचीच्या पाण्याच्या टाकीवरच चढून शोले स्टाईलने आंदोलन केले. विद्युत आणि पिण्याच्या पाण्यासाठी सुमारे सात तास हे आंदोलन सुरू होते. मुख्याधिकाऱ्यांनी लेखी पत्र देऊन गुरुवारी चर्चेसाठी बोलाविल्याने आंदोलनकर्त्याने सात तासांनंतर आपले आंदोलन मागे घेतले. दरम्यान, पोलिसांनी आंदोलनकर्त्याला अटक करून त्याच्याविरोधात गुन्हा दाखल केला आहे. मेहकर नगरपरिषदेच्यावतीने जानेफळ रस्त्यावरील गरजू लोकांसाठी घरकुल बांधून काही वाटप करण्यात आलेले आहे. मात्र या घरकुलात लाभार्थ्यांना पिण्याच्या पाण्याच्या व्यवस्थेसह वीज पुरवठा होत नसल्याने लाभार्थ्यांना अंधारात राहावे लागत आहे.गेल्या चार-पाच वर्षांपासून घरकुल क्रमांक ९५ मध्ये राहणाऱ्या अशपाक शहा यांनी एक ते दोन महिन्यांपूर्वी नगरपालिकेत मुख्याधिकारी यांच्या नावाने रहात असलेल्या घरकुलात सुविधा देण्याची मागणी केली होती. नगरपरिषद घरकुल लाभार्थ्यांना पिण्याच्या पाण्याची सुविधा, वीज कनेक्शन पुरवीत नसल्याने या घरकुलात राहणाऱ्या अशपाक शाह यांनी बुधवारी सकाळी नऊ वाजता घरकुलाच्या परिसरात घरकुलांच्या लाभार्थ्यांसाठी बांधण्यात आलेल्या १३० फूट उंची असलेल्या पिण्याच्या पाण्याच्या टाकीवर चढून शोले स्टाईलने आंदोलन सुरू केले होते. दरम्यान, पोलीस, नगर परिषद व महावितरणचे कर्मचारी उपस्थित झाले. हे आंदोलन पाहण्यासाठी मोठ्या प्रमाणावर गर्दी होत असल्याने शेवटी पोलिसांना राखीव पोलीस दलाची तुकडी व नगरपरिषद यांना अग्निशामक दल पाचारण करावे लागले. यावेळी अशपाक शहा यांच्या समर्थनासाठी इतर लाभर्थी या ठिकाणी हजर होते.
मेहकर येथे वीज, पिण्याच्या पाण्यासाठी टाकीवर चढून आंदोलन
By लोकमत न्यूज नेटवर्क | Published: April 22, 2021 12:22 PM