ज्वारी, मका, तुरीचे उत्पादन घटणार

बुलडाणा जिल्ह्यातील पेरणी पावसाआभावी खोळंबली; तृणधान्य व कडधान्य पिकांची सरासरी १६ टक्के पेरणी.

बुलडाणा : जिल्ह्यात यावर्षी ७.४२ लाख हेक्टरवर खरिपाच्या पेरणीचे नियोजन आहे. यात नगदी उत्पन्न देणार्‍या तृणधान्य व कडधान्यासाठी एकूण २ लाख ८७ हजार हेक्टर क्षेत्र निर्धारित करण्यात आले आहे; मात्र पावसाआभावी या पिकांच्या पेरण्या खोळंबल्या आहेत. येत्या काही दिवसांत पाऊस आला नाही, तरी जिल्ह्यात तृणधान्य व कडधान्याची पिके घटण्याचे संकेत आहेत. दरम्यान, आजपर्यंत सरासरी १६ टक्के पेरणी आटोपली आहे. गतवर्षी अतवृष्टीमुळे सोयाबीन आणि कापूस या दोन्ही पिकांना मोठा फटका बसला. याशिवाय अवकाळी पावसाने झोडपल्यामुळे सोयाबीन व कापूस पिकांचे जास्त नुकसान झाले. अशावेळी शेतकर्‍यांना तृणधान्य व कडधान्याचा मोठा आधार लाभला होता. यातून बर्‍यापैकी उत्पन्न मिळल्याने शेतकरी यंदाच्या खरीप हंगामासाठी तयार राहू शकला. त्यामुळे यंदाच्या खरीप हंगामाच्या नियोजनात कृषी विभागाने या पिकांच्या पेरणीकडे लक्ष दिले. जिल्ह्यात खरिपाची पेरणी ७ लाख ४२ हजार ८९३ हेक्टर क्षेत्रावर होत आहे. यात ज्वारी, बाजरी, मका या तृणधान्यासाठी १ लाख २१ हजार १00 हेक्टर, तर तूर, मूग, उडीद या कडधान्यासाठी १ लाख ६६ हजार ५00 हेक्टरचे नियोजन आहे; मात्र जून महिन्याच्या शेवटपर्यंत तृणधान्याची १३ हजार आणि कडधान्याची ४४ हजार हेक्टरवर पेरणी होऊ शकली. निसर्गाच्या दुष्टचक्रामुळे आर्थिक व मानसिकरीत्या खचलेला शेतकरी पावसाच्या प्रतीक्षेत आभाळाकडे डोळे लावून बसला आहे.