धाड भागात अवैध वृक्षतोड

मढ ते सैलानी दरम्यान डोंगराळ भागातील वृक्षसंपदा झपाट्याने विरळ होतेय.

धाड (जि. बंलडाणा): : परिसरातील वन आणि राजस्व विभागात गेल्या काही महिन्यांत वृक्षांची बेसुमार कत्तल होत असून, या भागातील वृक्षसंपदा झपाट्याने कमी होत असताना वन विभाग केवळ थातूर-मातूर कारवाई करून वेळ मारुन नेत असल्याचा आरोप गणेश सोनुने व सहकार्‍यांनी ४ सप्टेबर रोजी केला. धाड भागात मढ ते सैलानी दरम्यान डोंगराळ भाग आहे. या डोंगरात मौल्यवान वृक्षांची होणारी वृक्षतोड तसेच नव्याने वृक्षारोपण व संगोपनावर असणारे कमालीचे दुर्लक्ष यामुळे जंगल ओसाड बनत चालले आहे. वनक्षेत्रापासून अवघ्या काही अंतरावर धाडमध्ये सॉ-मिल आहेत. या सॉ-मिलकरिता वृक्षांची बेसुमार कटाई करण्यात येते, असा आक्षेप आहे. दरम्यान, येथील सॉ-मिलवर अवैध वृक्षतोडीसंदर्भात पूर्वीच अनेक गुन्हे दाखल आहेत. आजही या सॉ-मिलच्या आवारात मोठय़ा प्रमाणात तोडलेल्या वृक्षांचा मोठा साठा तसाच पडून आहे. या सॉ-मिलनजीक हजारो घनफुट वृक्ष कटाई करून पडून आहे. यासंदर्भात चौकशी करावी, अशी मागणी सोनुने यांनी केली आहे.