८२ लाखाचा निधी पडून

मेहकर तालुक्यातील गारपीटग्रस्त मदतीपासून वंचीत.

मेहकर : तालुक्यातील लाभार्थी शेतकर्‍यांनी बँकेत खाते न उघडल्याने तब्बल ८२ लाख ३ हजार ९00 रुपये निधी तहसिल कार्यालयाकडे पडून आहे. त्यामुळे तालुक्यातील १७८७ गारपीटग्रस्त मदतीपासून वंचित आहेत. मार्च महिन्यात झालेल्या गारपीट व अवकाळी पावसामुळे शेकर्‍यांचे रब्बी पिकासह भाजीपाला व फळबागांचे मोठय़ा प्रमाणात नुकसान झाले होते. तसेच वादळीवार्‍याने अनेकांच्या घरावरची छपरे उडून काही लोक बेघर झाले होते. गारपीटीमध्ये तब्बल ४४३७.२७ हेक्टर वरील बागायती पिकांची व ३५.६0 हेक्टरवरील बहुवार्षीक पिकांचे नुकसान झाले होते. गारपिटग्रस्ताच्या अनुदानापोटी शासनाकडून ६ कोटी ७४ लाख ३0 हजार १00 रुपये अनुदान प्राप्त झाले आहे. प्राप्त अनुदानापैकी ३ कोटी १९ लाख ९४ हजार ४५0 रुपये शेतकर्‍यांच्या खात्यात जमा करण्यात आले आहे. तर २ कोटी ७२ लाख ३१ हजार ७५0 रुपये येत्या दोन दिवसात बँकेत जमा होणार आहेत. मात्र महसूल प्रशासनाने अशाप्रकारे गारपीटग्रस्तांना आतापर्यत ५ कोटी ९२ लाख २६ हजार वाटप केले असले तरी अद्यापही १७८७ खातेदारांनी बँकेत खाते न उघडल्याने त्यांचे ८२ लाख ३ हजार ९00 रुपये तहसिल कार्यालयात पडून आहेत.