संस्थेविरूध्द दाखल केलेल्या तक्रारीची सखोल चौकशी व्हावी

मातृभूमी फाऊंडेशनची मागणी, सपकाळ यांना बदनाम करण्याचा प्रकार असल्याचा आरोप.

बुलडाणा : एचआयव्ही एडस् संबंधित प्रकल्पाच्या अनुषंगाने एका महिलेने आमदार हर्षवर्धन सपकाळ संबंधित मातृभूमी फाऊंडेशनविरूध्द दाखल केलेल्या तक्रारीची सखोल चौकशी करावी, तसेच सदर तक्रारीमागील बोलविता धनी व पडद्यामागील सूत्रधारांविरूध्द कारवाई करावी, अशी मागणी मातृभूमी फाऊंडेशनचे कोषाध्यक्ष अनंत जाधव यांनी केली आहे. याबाबत दिलेल्या निवेदनात त्यांनी नमूद केले आहे की, जिल्ह्यात आजमितीस २७१२ एचआयव्ही बाधित रूग्ण आढळून आले आहेत. प्रत्यक्षात त्यापेक्षा ही संख्या जास्त आहे. याबाबत मातृभूमी फाऊंडेशन ही संख्या सामाजिक उत्तरदायित्वाच्या भावनेने गेल्या १८ वर्षापासून कार्य करीत आहे. या पृष्ठभूमीवर प्रकल्पाच्या अनुषंगाने संस्थेशी संबंधित आमदार हर्षवर्धन सपकाळ यांच्या विरोधात एका महिलेने तक्रार दाखल केली आहे. सदर तक्रार खोटी आणि आमदार सपकाळ यांना बदनाम करण्याचा हा किळसवाणा प्रकार असून, या तक्रारीबाबत सखोल चौकशी झालीच पाहिजे, अशी मागणी मातृभमी फाऊंडेशन संस्थेने केली आहे. चौकशी अंती कुठलेही आरोप सिध्द होणार नाहीत, असा विश्‍वास निवेदनामध्ये व्यक्त करण्यात आला आहे. तक्रारीमागचे बोलविते धनी व पडद्यामागचे सुत्रधार यांच्यावर कारवाई झालीच पाहिजे. अशी मागणीही संस्थेच्या वतीने कोषाध्यक्ष जाधव यांनी केली आहे. या प्रकरणामागे असलेल्या कंपूने आमदार सपकाळ यांना बदनाम करण्याची श्रृखंला सुरू केली असल्याचा आरोप त्यांनी केला आहे. यापूर्वीही त्यांच्या घराचे बांधकाम हे वनजमिनीशी संबंधित करून तक्रार करण्यात आली होती. याबाबत वारंवार पैशाची मागणीसुध्दा करण्यात आली होती. यावेळीही तक्रारदार महिलेची चित्रफित व दस्ताऐवज दाखवून पैशाची मागणी करण्यात आली असल्याचा गौप्यस्फोट जाधव यांनी केला. त्यांच्या धमक्यांना भिक न घालता येणार्‍या प्रसंगांना सामोरे जाण्याची भूमिका संस्थेने स्विकारली होती. सदर प्रकल्पाअंतर्गंत कोणत्याही महिलेचे नाव बळजबरीने किंवा दिशाभूल करून नोंदविलेले नाही, त्यामुळे कुणाचीही बदनामी करण्याचा प्रश्न येत नाही, असे जाधव यांनी स्पष्ट केले. या प्रकरणामागे असलेली मंडळी ब्लॅकमेलींग करणार्‍या वृत्तीची असल्याचा आरोप करून, संबंधित महिलेच्या तक्रारीची सखोल चौकशी करून तक्रारीमागे असलेल्या बोलविता धनीविरूध्द कडक कारवाई करावी, अशी मागणी जाधव यांनी केली आहे.