दिवसाढवळ्या घरात घुसून महिलांचे दागिने लुटले

अनुराबाद व मलकापूर येथील घटना.

मलकापूर (जि. बुलडाणा): महिलेला घरात एकटे पाहून अज्ञात चोरट्यांनी मारहाण करुन दागिण्यांसह रोख रक्कम लुटल्याच्या दोन वेगवेगळ्या घटना अनुराबाद व मलकापूर शहरात २४ जुल रोजी दिवसाढवळ्या घडल्याने परिसरात भितीचे वातावरण निर्माण झाले आहे.तालुक्यातील अनुराबाद येथील सौ.अर्चना सुरेश देठे (वय ३२) ही महिला घरात एकटी असल्याचे पाहून दोन ३५ ते ४५ वयोगटातील अज्ञात इसमांनी घरात प्रवेश करीत या विवाहितेला चाकूचा धाक दाखवून तिच्या गळ्यातील मनीमंगळसुत्राची ६ ग्रॅम सोन्याची पोथ अंदाजे किंमत १२ हजार रुपये तर नगदी ७ हजार रुपये असा एकूण १९ हजार रुपयांचा मुद्देमाल लंपास केला. ही घटना शुक्रवारी सकाळी ९.३0 वाजेच्या सुमारास घडली.तर शहरातील बारादरी परिसरात राहणार्‍या सौ.कांचन संतोष पाटील (वय २0) ही विवाहिता एकटी असल्याचे पाहत एका इसमाने तिच्या घरात प्रवेश करीत तिला लोटपाट करुन मारहाण करीत गळ्यातील सोन्याच्या दोन पोथी अंदाजे किंमत १२ हजार रु., सोन्याचे कानातले ५ ग्रॅम अंदाजे किं.१0 हजार, चांदीचे जोडवे १0 ग्रॅम अंदाजे कि.५00 रुपये, नगदी १५ हजार असा एकूण ३७ हजार ५00 रुपयांचा मुद्देमाल लंपास करुन आरोपी फरार झाल्याची घटना सकाळी ११.३0 वा. च्या सुमारास घडली.दिवसाढवळ्या परिसरात घडलेल्या या घटनांमुळे नागरिकांमध्ये भितीचे वातावरण निर्माण झाले असून या दोन्ही घटनांमध्ये शहर पोलिसांनी अज्ञात आरोपीविरुध्द गुन्हे दाखल केले आहेत. याप्रकरणी एपीआय सपकाळे व एपीआय मोरे अधिक तपास करीत आहेत.