३६४ शाळाबाह्य मुले शाळेत!

बुलडाणा जिल्ह्यातील ६६८ शालाबाह्य मुलांपैकी ६३४ मुलांना शाळांमध्ये प्रवेश मिळाला असून उर्वरित मुलांना शोधण्याची गरज.

हर्षनंदन वाघ /बुलडाणा : एकही मूल शाळाबाह्य राहू नये, यासाठी शासनाच्या निर्देशानुसार जिल्हा परिषद शिक्षण विभागाकडून मागील काही महिन्यांपूर्वी शाळाबाह्य मुलांचे सर्वेक्षण करण्यात आले होते. यावेळी सुमारे ६६८ मुले आढळून आली होती. यापैकी ३६४ मुलांना वेगवेगळ्या शाळांमध्ये प्रवेश देण्यात आला आहे. तर उर्वरित मुले शाळेत येण्यासाठी शिक्षण विभाग प्रयत्न करीत आहेत. प्रत्येक मुला-मुलींना शिक्षण मिळाले पाहिजे, या उद्देशाने शासनाकडून विविध योजना, उपक्रम हाती घेण्यात आले आहेत. असे असले तरी विविध कारणांमुळे अनेक विद्यार्थ्यांनी शाळेचे तोंडही पाहिलेले नव्हते. याचे गांभीर्य लक्षात घेऊन शासनाने जिल्ह्यात अशी शाळाबाह्य विद्यार्थी किती आहेत? याचा शोध घेण्याचे निर्देशित केले होते. त्यानुसार जिल्हा परिषद शिक्षण विभागाकडून या कामासाठी अधिकारी, कर्मचार्‍यांची नेमणूक करून ४ जुलै रोजी सर्वेक्षण करण्यात आले होते. त्यानुसार पहिल्या दिवशी जिल्हाभरात मिळून सुमारे ६६२ मुले शाळाबाह्य असल्याचे समोर आले होते. त्यात बुलडाणा तालुक्यात एकूण २९ शाळाबाह्य मुले आढळली, त्यात २१ मुले, ८ मुली आहेत. चिखली तालुक्यात एकूण ४२. मुले २0, मुली २१, देऊळगाव राजा एकूण १२. मुले ८, मुली ४, सिंदखेडराजा एकूण १४. मुले ७, मुली ७, लोणार एकूण ४0. मुले १९, मुली २१, मेहकर एकूण १0. मुले ४, मुली ६, खामगाव एकूण १९४. मुले ११३, मुली ८१, शेगाव एकूण ४0. मुले ३१, मुली ९, संग्रामपूर एकूण १६९. मुले ८७, मुली ८२, जळगाव जामोद एकूण ३0. मुले ९ , मुली २१, नांदूरा एकूण १४. मुले ७, मुली ७, मलकापूर एकूण २१. मुले ११, मुली १0, मोताळा एकूण ४८. मुले २४ मुली २४, असे एकूण ६६२ शाळाबाह्य मुले ऑगस्ट महिन्यात आढळली होती; मात्र प्रशासनातर्फे सर्वेक्षणानंतर आढावा घेतल्यानंतर एकूण ६६८ मुले शाळाबाह्य असल्याचे समोर आले होते. दरम्यान, सर्वेनंतर संबंधित मुलांना नजीकच्या शाळेत प्रवेश देण्याबाबत शासनाकडून सांगण्यात आले होते. त्यानुसार जिल्हा परिषद शिक्षण विभागाकडून मागील काही दिवसांत ६६८ पैकी ३६४ मुला-मुलींना ऑगस्ट महिन्यापर्यंत प्रवेश देण्यात आला आहे.

* मुलांना शाळेत आणण्यासाठी कसरत

बुलडाणा जिल्ह्यात आढळलेल्या ६६८ शाळाबाह्य मुलांपैकी ३६४ मुलांना शाळेत प्रवेश देण्यात आला आहे. या मुलांना विविध कारणांमुळे शाळा सोडावी लागली होती; मात्र उर्वरित ३0४ मुले जन्मापासून शाळाबाह्य आहेत. त्यांना शाळेत आणण्यासाठी कसरत सुरू आहे. अशी मुले आढळल्यास त्यांना त्वरित शाळेत दाखल करून शिक्षणाच्या प्रवाहात आणण्याच्या सूचना शिक्षण विभागाने शिक्षकांना दिल्या आहेत.