विवाहितेसह तरुणीला भरधाव वाहनाने चिरडले; माेहघाटा जंगलातील घटना

सुरुची व साेनाली या दाेघीही दुचाकीने लाखनीहून साकाेलीकडे जात हाेत्या. दरम्यान, माेहघाटा जंगल शिवारात त्यांच्या दुचाकीला मागून अज्ञात वाहनाने जबर धडक दिली.

ठळक मुद्देसाकोली तालुक्याच्या माेहघाटा जंगलातील घटना

साकाेली (भंडारा) : दुचाकीने लाखनीहून साकाेलीकडे जात असताना माेहघाटा जंगलात अज्ञात वाहनाने दुचाकीला जबर धडक दिली. यात महिलेसह तरुणी ठार झाली. हा अपघात साेमवारी दुपारी १.३० वाजताच्या सुमारास झाला.

सुरुची रवींद्र मल्लेलवार (२६), रा. खुटसावरी, ता. भंडारा व साेनाली राहुल सांगीडवार (२८), रा. अकापूर, ता. मूल, जि. चंद्रपूर अशी मृतांची नावे आहेत. माहितीनुसार सुरुची व साेनाली या दाेघीही दुचाकीने लाखनीहून साकाेलीकडे जात हाेत्या. दरम्यान, माेहघाटा जंगल शिवारात त्यांच्या दुचाकीला मागून अज्ञात वाहनाने जबर धडक दिली. यात दाेघीही गंभीर जखमी झाल्या. त्यांना उपजिल्हा रुग्णालय, साकाेली येथे दाखल करण्यात आले; परंतु प्रकृती गंभीर असल्यामुळे त्यांना भंडारा जिल्हा सामान्य रुग्णालयात रेफर करण्यात आले; परंतु वाटेतच साेनाली यांचा मृत्यू झाला, तर सुरुची हिचा भंडारा येथे खासगी रुग्णालयात नेत असताना मृत्यू झाला.

तीन महिन्यांत दुसऱ्यांदा दु:खाचा डाेंगर

सुरुची ही वैद्यकीय शिक्षण घेत हाेती. दाेन बहिणी, एक भाऊ व आई असा सुरुचीचा परिवार आहे. उल्लेखनीय म्हणजे तीन महिन्यांपूर्वी ३ जानेवारीला सुरुचीच्या वडिलांचा मृत्यू झाला हाेता. अवघ्या तीन महिन्यांतच सुरुचीचा अकाली मृत्यू झाल्याने मल्लेलवार कुटुंबीयावर दु:खाचा डाेंगर काेसळला आहे. सुरुचीची आई ही गाेंडउमरी येथील प्राथमिक आराेग्य केंद्रात परिचारिका म्हणून कार्यरत आहे. चंद्रपूर जिल्ह्यातील रहिवासी असलेली साेनाली ही गृहिणी असून तिचे पती लाइनमन आहेत. साेनालीला अडीच वर्षांची मुलगी आहे.