तुमसर : 'माणुसकीची भिंत' ही चळवळ आता कुबेर नगरी म्हणून ओळखल्या जाणाऱ्या तुमसर शहरामध्ये सक्रिय झाली आहे. तुमसरातील सिंडीकेट मित्र परिवारच्या मित्रमंडळीने एकत्र येऊन "नको असेल ते द्यावे आणि हवे असेल ते घेऊन जावे,' असा संदेश देत अतिथी गृहाजवळील समोरील जागेत ही भिंत आहे. त्याला नागरिकांकडून मिळालेल्या वस्तू लटकविल्या आहेत. वस्तू देणारे व घेणारे यांचा या उपक्रमाला पहिल्याच दिवशी उत्स्फूर्त प्रतिसाद मिळाला.
'माणुसकीची भिंत'चे तुमसरात विधिवत शुभारंभ नगर परिषद तुमसरचे आरोग्य निरीक्षक मोहन बोरघरे यांच्या हस्ते करण्यात आले. यावेळी विष्णू जोशी, बाल्या मदनकर, बालू मस्के, अनिल कारेमोरे, कैलास जलवाने, सुनील लांजेवार, आदी मित्रमंडळी उपस्थित होते. 'गरजवंतांमधील दुवा होऊन निस्वार्थ भावनेने त्यांच्यापर्यंत मदत पोहोचावी' हा एकमेव उद्देश समोर ठेवून या सिंडीकेट मित्र परिवारच्या सदस्यांनी या संकल्पनेला हातभार लावत समाजोपयोगी कार्यात वाटा उचलत आहेत. या उपक्रमाच्या माध्यमातून गरीब, दुर्लभ घटकांतील गरजवंतांच्या आयुष्यात आनंदाचे काही क्षण देता यावे, यासाठी केलेला या प्रयत्नात तुमसर नगर परिषद प्रशासनाचे सहकार्य आहे. या माणुसकीच्या भिंतीवर जुने आणि चांगल्या स्थितीत असलेले शर्ट, पँट व लहान मुलांचे कपडे, महिलांकरिता साडी, गाऊन आदी कपड्यांची शृंखला भिंतीवर लटकवण्यात आली आहे. त्यामुळे या माणुसकीची भिंत चळवळीला तुमसरात उत्तम प्रतिसाद मिळत आहे