तुमसर तालुक्यात खरीप हंगामातील धान पिकाच्या लागवडीसाठी शेतकरी लगबग करीत आहेत. कृषी पंपधारक शेतकऱ्यांकडे वीजबिल थकीत आहे. अशा शेतकऱ्यांच्या कृषी पंपाची वीज खंडित करणे वीज वितरण कंपनीने सुरू केले आहे. ऐन हंगामात वीज वितरण कंपनीने वीज खंडित करण्याचा सपाटा सुरू केल्यामुळे शेतकऱ्यांत तीव्र नाराजी व्यक्त करण्यात येत आहे. सिंचनाची सोय असलेल्या शेतकऱ्यांनी धानाची पेरणी सुरू केली आहे. त्यामुळे शेतीला सध्या पाण्याची गरज आहे. अशावेळी पंपाची वीज खंडित झाल्यामुळे पेरणीला पाणी कुठून द्यावे, असा प्रश्न निर्माण झाला आहे.
कोट
खरीप हंगामाची सुरुवात झाली असून, शेतकऱ्यांना धान लागवडीकरिता पैशाची गरज आहे. कृषी पंपाचे वीज बिल भरले तर त्यांच्याकडे पैसे शिल्लक राहणार नाही. त्यामुळे अनेकांची शेती ही पडीक राहण्याची भीती आहे. शासनाने वीज वितरण कंपनीला कृषी पंपाची वीज खंडित करू नये, असे आदेश द्यावेत; अन्यथा शेतकऱ्यांसोबत रस्त्यावर उतरून विरोध करण्यात येईल.
शंकर राऊत, अध्यक्ष, तुमसर तालुका काँग्रेस कमिटी.
कोट
ज्या शेतकऱ्याकडे कृषी पंपाचे वीज बिल थकीत आहे, त्या शेतकऱ्यांची वीज खंडित करण्याच्या स्पष्ट सूचना शासनाकडून प्राप्त झाल्या आहेत. त्यानुसार थकीत शेतकऱ्यांच्या कृषी पंपाची वीज खंडित केली जात आहे.
रूपेश अवचट, उपकार्यकारी अभियंता, वीज वितरण कंपनी, तुमसर.