शासकीय कार्यालयांचे पासवर्ड असुरक्षित व्यक्तींच्या हातात

लोकमत न्यूज नेटवर्क भंडारा : शासनाच्या सर्व सुविधा आता ऑनलाईन झाल्या असून प्रत्येक शासकीय कार्यालय ऑनलाईन झाले आहे. याठिकाणी ...

ठळक मुद्देअनेक ठिकाणी खासगी व्यक्तींची नेमणूक । तलाठी कार्यालयांसह विविध ठिकाणी वापर

लोकमत न्यूज नेटवर्क
भंडारा : शासनाच्या सर्व सुविधा आता ऑनलाईन झाल्या असून प्रत्येक शासकीय कार्यालय ऑनलाईन झाले आहे. याठिकाणी ऑनलाईन कामासाठी गोपनीय पासवर्ड देण्यात आले आहे. मात्र अनेक कार्यालयात ही प्रणाली खासगी व्यक्ती हाताळत असून गोपनीय पासवर्ड असुरक्षित हाती गेल्याचे दिसून येत आहे.
तलाठी साझासह विविध कामे जलद गतीने व्हावे, जनतेला कागदपत्र वेळेत मिळावे यासाठी संगणकीकृत ऑनलाईन प्रणाली अस्तित्वात आली आहे. सर्वसामान्य नागरिकांना यामुळे विविध दाखले मिळणे सोईचे झाले आहे. परंतु अनेक ठिकाणी आता ही आॅनलाईनची कामे करण्यासाठी खासगी व्यक्तींची सेवा घेतली जात असल्याचे दिसून येते. अनेक कर्मचारी ऑनलाईन प्रणाली हाताळण्यास घाबरताना दिसतात. त्यामुळे त्यांनी आपल्या सोयीसाठी नियमबाह्य खासगी व्यक्तींची नेमणूक केली आहे. आपली कामे करण्यासाठी त्या व्यक्तींना गोपनीय पासवर्ड देण्यात आला आहे. सदर कर्मचाऱ्यांच्या मर्जीतील ही मंडळी असली तरी या पासवर्डचा गैरवापर होण्याची शक्यता नाकारता येत नाही. अनेकदा ऑनलाईन प्रणाली हाताळताना चुकीच्या नोंदी होण्याची शक्यता नाकारता येत नाही. मात्र याकडे कुणाचेही लक्ष दिसत नाही. तलाठी साझ्यासह अनेक कार्यालयात कर्मचाऱ्याआड खासगी व्यक्ती आॅनलाईन प्रणाली हाताळत असल्याने गोपनीयतेचा भंग होत असल्याचे दिसत आहे.

तलाठी संवर्गातील कर्मचाऱ्यांना शासनाने सर्व कामे ऑनलाईन करण्याचे सक्तीचे केले आहे. त्यांना सॉफ्टवेअर पुरविण्यात आले आहे. त्यासाठी गोपनीय पासवर्ड देण्यात आले. सात बारा अद्यावत करणे, फेरफार नोंदविणे, वारसा फेरफार करणे, क्षेत्र दुरूस्ती करणे अशी कामे तलाठ्यांकडून केली जातात. परंतु काही तलाठी साझ्यामध्ये गेल्यास तेथे खासगी व्यक्ती ऑनलाईन प्रणालीवर काम करताना दिसून येते. वरिष्ठांनी याप्रकरणी लक्ष घालण्याची गरज आहे.