लोककलावंतांचा जिल्हा कचेरीवर मोर्चा

मोर्चाचे नेतृत्व सामाजिक चळवळीचे नेते परमानंद मेश्राम, संघटनेचे अध्यक्ष भावेश कोटांगले यांनी केले. मोर्चाला दुपारी १२ वाजता विश्रामगृह येथून प्रारंभ करण्यात आला. मोर्चा थेट जिल्हाधिकारी कार्यालयासमोर धडकला. येथे मोर्चाचे रूपांतर सभेत झाले. सभेला परमानंद मेश्राम, भावेश कोटांगले व पदाधिकाऱ्यांनी मार्गदर्शन केले.

ठळक मुद्देआर्थिक पॅकेजची मागणी : जिल्हाधिकाऱ्यांना निवेदन

लोकमत न्यूज नेटवर्क
भंडारा : कोरोना संकट काळात लोक कलावंतावर उपासमारीचे संकट ओढावले आहे. त्यामुळे लोक कलावंतांना आर्थिक पॅकेज जाहीर करण्यात यावे, त्यांचे सांस्कृतिक कार्यक्रम सुरू करण्यात यावे या मागणीसाठी प्रतीभावंत प्रबोधनकार कलासाहित्य संघटना शाखा भंडारा, गोंदियाच्या पदाधिकाऱ्यांनी सोमवारी जिल्हाधिकारी कार्यालयावर मोर्चा काढला.
मोर्चाचे नेतृत्व सामाजिक चळवळीचे नेते परमानंद मेश्राम, संघटनेचे अध्यक्ष भावेश कोटांगले यांनी केले. मोर्चाला दुपारी १२ वाजता विश्रामगृह येथून प्रारंभ करण्यात आला. मोर्चा थेट जिल्हाधिकारी कार्यालयासमोर धडकला. येथे मोर्चाचे रूपांतर सभेत झाले. सभेला परमानंद मेश्राम, भावेश कोटांगले व पदाधिकाऱ्यांनी मार्गदर्शन केले. ते म्हणाले, भंडारा, गोंदिया जिल्ह्यातील कलावंत हजारो वर्षांची संगिताची व कला कौशल्यांची वैभवशाली परंपरा जोपासण्यासाठी समाजप्रबोधनाच्या माध्यमातून कार्य करीत आहेत. त्यामुळे त्यांना आर्थिक पॅकेज जाहीर करण्यात यावे, सांस्कृतीक कार्यक्रम सुरू करण्यात यावे अशी मागणी करण्यात आली. दुपारी ४ वाजतानंतर शिष्टमंडळाने जिल्हाधिकारी यांची भेट घेवून चर्चा केली. त्यानंतर मागण्यांचे निवेदन जिल्हाधिकाºयांना सोपविण्यात आले. सदर मागण्या मंजूर न झाल्यास लवकरच संघटनेच्या माध्यमातून सांस्कृतीक मंत्र्यांच्या घेराव घालण्याचा इशारा देण्यात आला.

गीतातून मांडल्या व्यथा
मोर्चाच्या सुरूवातीला उपस्थित मोर्चेकरांनी गीत गायनातून व्यथा मांडल्या. अनेकांचे मोर्चाकडे लक्ष वेधून घेतले. अरुण भेदे, प्रकाश तितीरमारे, सुरेंद्र उके, सुशिल खांडेकर, सोमप्रभू तांदूळ, दीपक लाहोरी, गीता रामटेके, अक्षय मेश्राम यांच्यासह प्रबोधनकार कलासाहित्य संघटनेचे पदाधिकारी उपस्थित होते.