लाखांदुरात मिळणार मोफत पाठ्यपुस्तके

वर्ग पहली ते आठवीच्या जवळपास १३ हजार विद्यार्थ्यांना मोफत शालेय पाठ्यपुस्तके मिळणार असल्याची माहिती आहे. सदरची पाठ्यपुस्तके लाखांदूर पंचायत समितीच्या शिक्षण विभागाअंतर्गत तालुक्यातील सर्वच सहा केंद्राअंतर्गत प्राथमिक व माध्यमिक शाळांमध्ये उपलब्ध केले जाणार आहेत.

ठळक मुद्देपहिली ते आठवीच्या १३ हजार विद्यार्थ्यांचा समावेश

लोकमत न्यूज नेटवर्क
लाखांदूर : शिक्षण विभागाच्या समग्र शिक्षा अभियानाअंतर्गत लाखांदूर तालुक्यातील वर्ग पहली ते आठवीच्या जवळपास १३ हजार विद्यार्थ्यांना मोफत शालेय पाठ्यपुस्तके मिळणार असल्याची माहिती आहे. सदरची पाठ्यपुस्तके लाखांदूर पंचायत समितीच्या शिक्षण विभागाअंतर्गत तालुक्यातील सर्वच सहा केंद्राअंतर्गत प्राथमिक व माध्यमिक शाळांमध्ये उपलब्ध केले जाणार आहेत.
लाखांदूर तालुक्यात जिल्हा परिषदेच्या व खाजगी अनुदानित एकूण ९५ प्राथमिक शाळा आहेत. २८ माध्यमिक शाळा आहेत. प्राथमिक शाळेमध्ये जिल्हा परिषदच्या ८५, खाजगी अनुदानित १०, तर २८ माध्यमिक शाळा मिळुन एकुण १२३ शाळांमधील वर्ग एक ते आठवीच्या विद्यार्थ्यांना मोफत शालेय पाठ्यपुस्तके वितरीत केले जाणार आहेत. त्यानुसार इयत्ता पहिलीमधील १४६६ विद्यार्थी, दुसरीतील १६०३ विद्यार्थी, तिसरीतील १६०३ विद्यार्थी, चौथीतील १७५६, पाचवीतील १६४६, इयत्ता सहावीतील १५३१, इयत्ता सातवीतील १६४४ व आठवीतील १६०१, अशी एकुण १२ हजार ८५० विद्यार्थ्यांना मोफत शालेय पाठ्यपुस्तकांचे वितरण केले जाणार आहे.
दरम्यान, लाखांदूर पंचायत समितीच्या शिक्षण विभागाअंतर्गत यंदाच्या शैक्षणिक सत्रातील तालुक्यातील विविध १२३ शाळांमधील विद्यार्थ्यांना शालेय पाठ्यपुस्तके उपलब्ध होण्यासाठी सर्वच सहाही केद्रांना पाठ्यपुस्तकांचा पुरवठा करण्यात आला आहे. मात्र कोरोना विषाणुच्या परिस्थितीत लॉकडाऊन असल्याने दरवर्षी २६ जुनला उघडली जाणारी शाळा यावर्षीदेखील विहीत तारखेलाच उघडली जाणार अथवा नाही हे मात्र गुलदस्त्यात असले तरी प्रशासनाकडून लवकरच स्पष्ट होणार आहेत.