राहुल भुतांगे
तुमसर : घरकुल बांधकाम साहित्य गोळा करताना लाभार्थ्यांना मोठी दमछाक होते. घर पूर्ण करताना अनंत अडचणींचा सामना करावा लागतो. परंतु आता घरकुल बांधकामासाठी लागणारे सर्व साहित्य एकाच छताखाली उपलब्ध होणार आहे. घरकुल मार्ट अभियानांतर्गत तालुक्यातील मच्छेरा येथे पहिला प्रयोग करण्यात आला आहे.
तालुक्यातील मच्छेरा येथील आस्था महिला बचत गटातर्फे अभियानांतर्गत नाविन्यपूर्ण उपक्रम राबविले जात आहेत. या ग्रामीण घरकुल मार्टचे उद्घाटन गटविकास अधिकारी धीरज पाटील यांच्या हस्ते करण्यात आले. या घरकुल मार्टमध्ये लाभार्थ्यांना बांधकामासाठी सिमेंट, लोखंडी सळाकी, विटा, दरवाजे, खिळे, तार, शौचालय सीट, खिडकी आदी साहित्य एकाच छताखाली उपलब्ध होणार आहेत. तुमसर तालुक्यातील ग्रामीण भागातील नागरिकांना १५ ते २० किलोमीटर अंतरावरुन साहित्य विकत आणावे लागत होते. मात्र आता या घरकुल मार्टमुळे लाभार्थ्यांना वाहतुकीचा खर्च वाचणार असून वेळेची बचत होणार आहे. या घरकुल मार्टचा फायदा सिहोरा परिसरातील १५ ते २० गावांना होणार आहे. या परिसरात २०० ते ३०० लाभार्थी असून त्यांना या मार्टमध्ये माफक दराने गुणवत्तापुर्ण साहित्य उपलब्ध होणार आहे.
२०२२ पर्यंत सर्वांसाठी घर हे शासनाचे महत्वाकांक्षी धोरण आहे. राज्य शासनाने देखील या धोरणाचा स्वीकार केला आहे. शबरी आवास, रमाई आवास आदी घरकुल योजना राबविल्या जात आहेत. या अभियानाच्या यशस्वितेसाठी तालुका अभियान व्यवस्थापक पुरुषोत्तम बिसेन, तालुका व्यवस्थापक सुरेंद्र ठाकरे, प्रभाग समन्वयक खुशबू पालेवार, ग्रामसंघ अध्यक्ष रिता वासनिक, सचिव सविता शिवरकर, उमेद समुदाय संसाधन व्यक्ती आणि सदस्य यासाठी प्रयत्न करीत आहेत. मच्छेरा येथे सुरु झालेला हा अभिनव प्रयोग संपूर्ण जिल्ह्यासाठी दिशादर्शक ठरणार असून एकाच छताखाली साहित्य मिळणार असल्याने लाभार्थ्यांना दिलासा मिळेल.