आंधळगाव : मोहाडी तालुक्यातील हिवरा येथे रुमालाने मित्राचा गळा आवळून खूनप्रकरणात आणखी आरोपी असण्याची शक्यता वर्तविली जात आहे. एकट्याने हे कृत्य केले नसावे, असा कयास आहे. दरम्यान, याप्रकरणी मृताच्या वडिलांनी पोलीस अधीक्षकांकडे तक्रार दिली तर अटकेत असलेल्या आरोपीला पोलीस कोठडी देण्यात आली आहे.
अमोल पंजाब चवळे (वय २६) असे मृताचे नाव आहे. तर याप्रकरणी आरोपी राकेश सेवकराम मतारे (२६) याला अटक केली आहे. प्रेमप्रकरणातून मित्राचा रुमालाने गळा आवळून खून करण्यात आला. त्यानंतर मृतदेह विहिरीत टाकून पुरावे नष्ट करण्याचा प्रयत्न झाला. याप्रकरणात आणखी आरोपी असण्याची शक्यता वर्तविली जात आहे. घटनेत आरोपीने कुणाची दुचाकी वापरली, दुचाकीवर दोघेच जण घटनास्थळापर्यंत गेले काय? अशी चर्चा होत आहे. याप्रकरणी अमोलचे वडील पंजाब चवळे यांनी या प्रकरणात एकच आरोपी असू शकत नाही, असा संशय व्यक्त करीत जिल्हा पोलीस अधीक्षकांना तक्रार दिली आहे.