दोन दिवसात कोरोनाचे ६६ पॉझिटिव्ह रुग्ण

जिल्हा आरोग्य यंत्रणेकडूनही वाढती रुग्णसंख्या पाहता अधिक जबाबदारी घेतली जात आहे. स्थिती नियंत्रणात असली तरी वाढत्या रुग्णसंख्येने चिंतेत भर घातली आहे. भंडारा शहरातही गत आठवड्याभरात रुग्णसंख्या सातत्याने वाढत आहे. याच पार्श्वभूमीवर भंडारा शहरात शनिवार व रविवार असे दोन दिवस जनता कर्फ्यू लावण्यात आला होता.

ठळक मुद्देसंख्या पोहोचली ५४२ वर : सर्वाधिक रुग्ण भंडारा तालुक्यात, साकोली व मोहाडीत ५९ तर तुमसरात ६८ व्यक्ती बाधीत

लोकमत न्यूज नेटवर्क
भंडारा : जिल्ह्यात कोरोना विषाणू संसर्गाने परिस्थिती गंभीर केली आहे. शनिवारी ३६ तर रविवारी ३० रुग्ण बाधीत आढळल्यानंतर जिल्ह्यात एकुण बाधीतांची संख्या ५४२ वर पोहोचली आहे. विशेष म्हणजे १३ आॅगस्ट रोजी भंडारा तालुक्यातील एका ६५ वर्षीय महिलेला नागपूर येथे खाजगी रुग्णालयात उपचारार्थ दाखल करण्यात आले होते. तिचा १४ आॅगस्ट रोजी मृत्यू झाला. त्यामुळे कोरोनामुळे मृत्यू झालेल्यांची संख्या पाच झाली आहे. संसर्ग बाधीतांची संख्या सातत्याने वाढत असल्याचेही दिसून येत आहे.
तालुकानिहाय कोरोना बाधीतांच्या संख्येवर नजर घातल्यास सर्वाधिक रुग्ण भंडारा तालुक्यात दिसून येत आहे. आतापर्यंत भंडारा तालुक्यात १८९, साकोली ६७, लाखांदूर २५, तुमसर ८१, मोहाडी ९२, पवनी ४० तर लाखनी तालुक्यात ४८ रुग्ण पॉझिटिव्ह आढळले आहेत. रविवारी आढळलेल्या ३० रुग्णांपैकी भंडारा तालुक्यात १०, साकोली ०२, तुमसर तालुक्यात ०३, मोहाडी तालुक्यात ०८, पवनी तालुक्यात ०४ तर लाखनी तालुक्यात ०३ रुग्ण बाधीत आढळले आहे.
जिल्हा आरोग्य यंत्रणेकडूनही वाढती रुग्णसंख्या पाहता अधिक जबाबदारी घेतली जात आहे. स्थिती नियंत्रणात असली तरी वाढत्या रुग्णसंख्येने चिंतेत भर घातली आहे. भंडारा शहरातही गत आठवड्याभरात रुग्णसंख्या सातत्याने वाढत आहे. याच पार्श्वभूमीवर भंडारा शहरात शनिवार व रविवार असे दोन दिवस जनता कर्फ्यू लावण्यात आला होता. याला नागरिकांनी उत्स्फूर्तपणे प्रतिसादही दिला. जिल्ह्यात आतापर्यंत १ लक्ष १४ हजार २९१ नागरिकांनी आरोग्य सेतु अ‍ॅप डाऊनलोड करुन त्याचा उपयोग केला आहे. जिल्हा आरोग्य विभागाच्यावतीने १०२७८ व्यक्तींच्या घशातील स्वॅबचे नमुणे तपासणीसाठी नागपूर येथे पाठविले आहे. आजघडीला २०३ व्यक्ती पॉझिटिव्ह असून त्यांच्यावर उपचार सुरु आहे. आतापर्यंत आयसोलेशन वॉर्डातून ९३५ व्यक्तींना सुटी देण्यात आली आहे. या वॉर्डात आता १८१ व्यक्ती भरती आहेत. जिल्ह्यात अ‍ॅन्टीजेन टेस्ट कीटद्वारे ४०४४ व्यक्तींची तपासणी करण्यात आली असून त्यामध्ये आतापर्यंत १०८ व्यक्ती पॉझिटिव्ह आढळले आहेत. ३९३६ व्यक्तींचा अहवाल निगेटिव्ह आला आहे.

६५ वर्षीय महिलेचा मृत्यू
भंडारा तालुक्यातील रहिवासी असलेल्या एका ६५ वर्षीय महिला रुग्णाला मेंदू आघात झाल्याने १३ आॅगस्टच्या मध्यरात्री नागपूर येथील एका खाजगी रुग्णालयात दाखल करण्यात आले होते. कोविड चाचणी अहवाल पॉझिटिव्ह आला होता. सदर वृध्द महिलेचा उपचारादरम्यान १४ आॅगस्टला मृत्यू झाला. त्यामुळे जिल्ह्यात कोरोनामुळे मृत्यू पावणाऱ्यांची संख्या ०५ झाली आहे. शनिवारी ३६ रुग्ण आढळले असून त्यात भंडारा तालुक्यातील २०, साकोली ०५, मोहाडी तालुक्यातील १० तर लाखनी तालुक्यातील ०१ रुग्णाचा समावेश आहे. रविवारी १४५ जणांचे नमुणे तपासणीसाठी नागपूर येथे पाठविण्यात आले आहेत. रविवारी २१ जणांना आयसोलेशन वॉर्डातून सुटी देण्यात आली आहे.

३३४ रुग्णांना मिळाली सुटी
२७ एप्रिल रोजी पहिला कोरोनाबाधीत रुग्ण आढळल्यानंतर आजपर्यंत एकुण रुग्ण संख्या ५४२ इतकी झाली आहे. आठवड्याभरापूर्वी ३००च्या घरात असलेल्या या संख्येने आठ दिवसांच्या कालावधीत पाचशेचा टप्पा ओलांडला आहे. आतापर्यंत ३३४ व्यक्तींना सुटी देण्यात आली आहे.