Shree Lakshmi Panchami 2022: श्री पंचमी: एकदाच करा पूजा; वर्षभर राहील लक्ष्मी देवीची कृपा, कमी पडणार नाही पैसा!

Shree Lakshmi Panchami 2022: चैत्र महिन्यातील पंचमीला लक्ष्मी देवीचे पूजन करणे अत्यंत शुभ मानले गेले असून, नानाविध लाभ मिळू शकतात, असे सांगितले जाते.

हिंदू नववर्षाला सुरुवात झाली आहे. गुढीपाडवा धुमधडाक्यात साजरा करत नववर्षाचे स्वागत उत्साहात करण्यात आले. नववर्षातील पहिला चैत्र महिना शुभ आणि पवित्र मानला जातो. या महिन्यातील प्रत्येक तिथीचे महत्त्व वेगळे आहे. चैत्र प्रतिपदेपासून ते राम नवमीपर्यंत चैत्री नवरात्र साजरे केले जाते. नववर्षाच्या सुरुवातीपासूनच सण-उत्सव, व्रत-वैकल्ये चालू होतात. चैत्र शुद्ध पंचमीला श्री पंचमी म्हणजेच श्री लक्ष्मी पंचमीचे व्रताचरण केले जाते. या दिवशी केल्या जाणाऱ्या लक्ष्मी देवीच्या पूजनाला अनन्य साधारण महत्त्व असल्याचे सांगितले जाते. श्रीपंचमीचे महत्त्व, मान्यता आणि व्रताचरण पूजनाची पद्धत जाणून घेऊया... (Shree Lakshmi Panchami 2022)

चैत्र शुद्ध पंचमीला साजरी केली जाणारी श्री पंचमी किंवा श्री लक्ष्मी पंचमी यंदाच्या वर्षी बुधवार, ०६ एप्रिल २०२२ रोजी आहे. लक्ष्मी देवीला धन, वैभव, सुख, समृद्धी, विष्णुप्रिया मानले जाते. या दिवशी लक्ष्मी देवीचे पूजन अतिशय महत्त्वाचे मानले जाते. या दिवशी लक्ष्मी देवीचे पूजन केल्यास आर्थिक अडचणी दूर होण्यास मदत मिळू शकते. धनलाभासह अनेकविध फायदे मिळू शकतात, असे सांगितले जाते. (Shree Lakshmi Panchami 2022 Date and Time)

असे करावे व्रताचरण 

श्री पंचमीला लक्ष्मी देवीची विशेष पूजन करावे, असे सांगितले जाते. सकाळी लवकर उठून स्नानादी नित्यकर्म उरकल्यानंतर लक्ष्मी देवीच्या पूजेला सुरुवात करावी. आपापले कुळधर्म, कुळाचार यानुसार षोडशोपचार पूजा करावी. यावेळी धान्य, हळद आणि गुळ देवीला अर्पण करावा. शक्य असल्यास या दिवशी श्रीयंत्राची स्थापना करावी. ते अतिशय शुभ मानले जाते. तसेच लक्ष्मी देवीला कमळाचे फूल अर्पण करावे. श्रीसुक्ताचे पठण करावे. श्रीसुक्ताचे पठण शक्य नसल्यास श्रवण करावे. लक्ष्मी देवीला सौभाग्याच्या वस्तू अर्पण कराव्यात. लाल रंगाचे वस्त्र अर्पण करावे. पूजा झाल्यावर खिरीचा नैवेद्य दाखवावा. शक्य असेल तर कुमारिकांना खिरीचा प्रसाद द्यावा. संपूर्ण पूजा आटोपल्यानंतर यथाशक्ती ॐ ह्रीं श्रीं लक्ष्मीभयो नमः॥, ॐ श्रीं ह्रीं श्रीं कमले कमलालये प्रसीद प्रसीद ॐ श्रीं ह्रीं श्रीं महालक्ष्मयै नम:॥, ॐ श्री महालक्ष्म्यै च विद्महे विष्णु पत्न्यै च धीमहि तन्नो लक्ष्मी प्रचोदयात् ॐ॥ या मंत्रांचा जप करावा. (Shree Lakshmi Panchami 2022 Puja Vidhi) 

श्री पंचमीला दानाचे विशेष महत्त्व

श्री पंचमी किंवा श्री लक्ष्मी पंचमीला दानाचे विशेष महत्त्व असल्याचे सांगितले जात आहे. या दिवशी गोमातेला अन्नदान करणे अत्यंत शुभ मानले गेले आहे. याशिवाय यथाशक्ती दानधर्म करावा, असे सांगितले जाते. असे केल्याने लक्ष्मी देवीची कृपा आपल्यावर सदैव राहू शकते, अशी मान्यता आहे. सदर माहिती मान्यतांवर आधारित असून, आपापल्या पद्धती, परंपरा यांप्रमाणे करावे, असे सांगितले जात आहे.