Guru Pradosh 2025: शिव तथा स्वामी समर्थांच्या कृपाप्राप्तीसाठी गुरु प्रदोषावर राशीनुसार करा उपाय!

Guru Pradosh 2025: १० एप्रिल रोजी गुरु प्रदोष आहे, हे व्रत कर्जमुक्ती तसेच आर्थिक लाभ देणारे आहे, त्यासाठी राशीनुसार दिलेले उपाय करा.

सर्व दोषातून मुक्त करणारे व्रत म्हणजे प्रदोष व्रत, हे व्रत दर महिन्यातील त्रयोदशी तिथीला केले जाते. या महिन्यात १० एप्रिल २०२५ रोजी गुरुवारी प्रदोष आल्यामुळे हे व्रत गुरु प्रदोष (Guru Pradosh 2025) म्हणून केले जाईल. या दिवशी राशीनुसार कोणते उपाय केले असता कर्जमुक्ती तसेच आर्थिक अडचणी दूर होतात ते जाणून घेऊ. 

प्रदोष व्रत हे ज्योतिष शास्त्रात अत्यंत महत्त्वाचे व्रत मानले जाते. प्रदोष व्रत भोलेशंकर भगवान शिव यांना समर्पित असल्याचे मानले जाते.  प्रदोष व्रत हे प्रत्येक वारानुसार वेगवेगळे फळ देणारे असते. हे व्रत केल्यामुळे भाग्य, आरोग्य, संपत्ती, आनंद, शांती, प्रेम, कर्जमुक्ती आणि बरेच शुभ परिणाम मिळतात तसेच सर्व मनोकामना पूर्ण होतात, अशी भाविकांची श्रद्धा आहे. प्रदोषाच्या दिवशी भगवान शिव, देवी पार्वती, भगवान गणेश आणि कार्तिकेय यांची पूजा केली जाते. 

गुरु प्रदोष निमित्ताने आपण शिव उपासने बरोबरच गुरु तथा श्री स्वामी समर्थ उपासना देखील केली पाहिजे आणि पुढे दिलेल्या गोष्टी राशीनुसार भोलेनाथाला अर्पण केल्या पाहिजेत. 

मेष: मेष राशीच्या लोकांनी भगवान शंकराला चंदनाचे गंध लावावे आणि 'ओम नमः शिवाय' मंत्रजप १०८ वेळा करावा. 

वृषभ : वृषभ राशीच्या लोकांनी भगवान शंकराला दूध आणि पवित्र धागा अर्पण करावा. महादेवाचा श्लोक म्हणून तो धागा उजव्या मनगटाला बांधावा. 

मिथुन: मिथुन राशीच्या लोकांनी प्रदोष व्रताच्या दिवशी भोलेनाथांना बेलपत्र अर्पण करावे.

कर्क : कर्क राशीच्या लोकांनी प्रदोष व्रताला भगवान शंकराला बेल आणि पांढरी फुलं अर्पण करून शिवजप करावा. 

सिंह : सिंह राशीच्या लोकांनी या तिथीला महादेवाला गूळ खोबऱ्याचा नैवेद्य दाखवावा. 

कन्या : कन्या राशीच्या लोकांनी भगवान शंकराला दूध पाण्याने किंवा पंचामृताने अभिषेक घालावा.

तूळ : तूळ राशीच्या लोकांनी प्रदोष व्रताच्या दिवशी भगवान शंकराला मध, पांढरे चंदन आणि बेलाचे पान अर्पण करावे.

वृश्चिक: वृश्चिक राशीच्या लोकांनी या शुभ मुहूर्तावर भोलेनाथांना लाल धागा अर्पण करावा आणि प्रसाद रुपी आपल्या उजव्या मनगटावर बांधून घ्यावा. 

धनु: धनु राशीच्या लोकांनी या शुभ दिवशी भगवान शंकराला केशर मिश्रित जल अर्पण करावे.

मकर : मकर राशीच्या लोकांनी प्रदोष व्रताच्या दिवशी शिवाला निळी फुले आणि शमीची पाने अर्पण करावीत.

कुंभ : कुंभ राशीच्या लोकांनी या तिथीला भगवान शंकराला काळे तीळ अर्पण करावेत.

मीन: मीन राशीच्या लोकांनी प्रदोष व्रताच्या दिवशी भगवान भोलेनाथांना नागकेसरचे फूल अर्पण करावे, ते मिळत नसल्यास कोणतेही पांढरे फुल अर्पण करावे.