संतोष देशमुख हत्या प्रकरणाचा वाल्मीक कराडच 'डायरेक्टर'; न्यायालयात ३ तास काय झाला युक्तिवाद?

Santosh Deshmukh Latest News: प्रथमतः कराड याच्या दोषमुक्तीसाठीच्या अर्जावर वकील एम. केज टी. यादव यांनी जवळपास दोन तास युक्तिवाद केला.

बीड : तालुक्यातील मस्साजोग येथील सरपंच संतोष देशमुख हत्या प्रकरणातील आरोपी वाल्मीक कराड याने मकोका गुन्ह्यातून दोषमुक्तीसाठी दाखल केलेल्या अर्जावर मंगळवारी जिल्हा न्यायालयात जवळपास ३ तास सुनावणी झाली. न्या. व्यंकटेश पाटवदकर यांनी निकाल राखून ठेवत पुढील सुनावणी ७ जुलै रोजी ठेवली आहे.

प्रथमतः कराड याच्या दोषमुक्तीसाठीच्या अर्जावर वकील एम. केज टी. यादव यांनी जवळपास दोन तास युक्तिवाद केला. त्यानंतर विशेष सरकारी वकील उज्ज्वल निकम यांनी ५० मिनिटे युक्तिवाद करत बाजू मांडली. आरोपी कराड याच्या वकिलांनी काही केसेसचा संदर्भ न्यायालयास दिला.

सुनावणीनंतर अॅड. यादव म्हणाले की, चार्जशिट एकत्रित करण्याबाबत न्यायालय निर्णय घेईल, आज फक्त दोषमुक्ती अर्जावर चर्चा झाली.

पुरेसे पुरावे उपलब्ध

पडद्यामागचा सूत्रधार हा वाल्मीक कराडच आहे. आवादाला दोन कोटी रुपये मागण्यात आले होते. या प्रकरणातील व्हिडीओ रेकॉर्डिंगसह पुरेसे पुरावे उपलब्ध आहेत. 

८ ऑक्टोबर २०२४ रोजी कराड याने २ कोटी रुपये मागितले होते. सुदर्शन घुले हा गँग लीडर आहे, मात्र पडद्यामागे त्याचा सूत्रधार हा कराडच आहे. 

सदरील प्रकरणाचा तपास पोलिस अधिकाऱ्यांनी नव्हे तर तज्ज्ञ सीआयडीने, डीआयजी रँक असलेल्या अधिकाऱ्यांनी केलेला आहे, असा युक्तिवाद विशेष सरकारी वकील उज्ज्वल निकम यांनी केला.

वाल्मीक कराड याच्याविरुद्ध आमच्याकडे काय काय पुरावे आहेत त्याची जंत्री न्यायालयासमोर सादर केली. कटाचा सूत्रधार हा नेहमी पडद्यामागे असतो आणि आपल्या कठपुतळ्यांच्या मार्फत तो दुष्कृत्य करत असतो. -उज्ज्वल निकम, विशेष सरकारी वकील

कराड हेच या प्रकरणाचा मुख्य सूत्रधार असल्याचे सरकारी पक्षाच्या वतीने सांगितले जात आहे. परंतु, त्यांच्याकडे कोणताही कायदेशीर पुरावा नाही. -अॅड. एम. टी. यादव, कराडचे वकील