मुख्याधिकारी मारहाणप्रकरणी दोघा जणांवर गुन्हा दाखल; आरोपींना तीन दिवसांची पोलीस कोठडी

नगरपंचायतचे मुख्याधिकारी प्रशांत पाटील हे कार्यालयीन कामकाज आटोपून निघाले असता त्यांच्यावर कार्यालय परिसरात मंगळवारी सायंकाळी सहाच्या सुमारास स्थापत्य अभियंता सुमितकुमार मेटे यांचे नातेवाईक दिलीप उध्दव मेटे व सुनील लक्ष्मण कदम यांनी अचानक चाकू, लोखंडी राॅडने जबर मारहाण केली. यामध्ये मुख्याधिकारी प्रशांत पाटील यांच्या उजव्या हाताला गंभीर जखम झाली असून मांडीवर व अंगावर मुक्का मार दिला आहे. याप्रकरणी मुख्याधिकारी प्रशांत पाटील यांच्या फिर्यादीवरून वडवणी पोलिसांत दिलीप उध्दव मेटे व सुनील लक्ष्मण कदम यांच्याविरोधात गुन्हा दाखल करण्यात आला. आरोपीला २० जानेवारी रोजी वडवणी न्यायालयात हजर केले असता न्या. एल. एम. पठाण यांनी तीन दिवसांची पोलीस कोठडी सुनावली. अधिक तपास पोलीस उपनिरीक्षक जयसिंग परदेशी यांच्या मार्गदर्शनाखाली पोलीस मनोज जोगदंड, लहू वाघमारे हे करत आहेत.