कोरोनाचा धोका
अंबाजोगाई : कोरोनाबाधितांची संख्या आणि मृत्युमुखी पडणाऱ्यांची संख्या कमी झालेली दिसत असली तरी कोरोना धोका टळलेला नाही. त्यामुळे नागरिकांनी योग्य ती खबरदारी घ्यावी. विनाकारण गर्दी करण्याचे टाळण्याचे आवाहन केले जात आहे. तरीही अनेकजण विनाकारण गर्दी करत आहेत. प्रवास करत आहेत. त्यामुळे धोका वाढत आहे. याची प्रत्येकानेच काळजी घेण्याची गरज निर्माण झाली आहे.
कर्णकर्कश हॉर्नवर बंदीची मागणी
अंबाजोगाई : शहरातील विविध शासकीय कार्यालये, शाळा, महाविद्यालये, रुग्णालये आदी परिसरांत दुचाकी चारचाकी वाहनधारकांकडून वाहनांचे कर्णकर्कश हॉर्न वाजवले जात आहेत. याचा नागरिकांना त्रास होत असून, वाहतूक पोलिसांनी याकडे लक्ष देणे गरजेचे आहे.
स्वच्छतागृहाचा अभाव
अंबाजोगाई: राष्ट्रीय महामार्गावर कित्येक किलोमीटर अंतरात सार्वजनिक स्वच्छतागृह नाहीत. त्यामुळे खासगी वाहनांतील प्रवाशांची गैरसोय होत असते. यासाठी खासगी ढाबे किंवा महामार्गाकडेच्या पेट्रोलपंपावरील स्वच्छतागृहाचा आधार घ्यावा लागत आहे. याबाबत संबंधित विभागाने योग्य नियोजन करून नागरिकांसाठी सुविधा उपलब्ध करून देण्याची मागणी होत आहे.
विमा कवचाची प्रतीक्षा
अंबाजोगाई: कोरोनाच्या काळात मजुरांना रोजगारासाठी विविध ठिकाणी भटकंती करावी लागत आहे.एकाच ठिकाणी रोजगार उपलब्ध होत नसल्याने जिथे काम मिळेल तिथे रोजगारासाठी जावे लागते, अशा स्थितीत कोरानाचा संसर्ग ओढवल्यास विमा कवच हवे, अशी मागणी सामाजिक कार्यकर्ते डॉ. निशिकांत पाचेगावकर यांनी केली आहे.