नितीन कांबळे
कडा : जिथे पिण्याच्या पाण्यासाठी पायपीट करावी लागायची तिथे आता फळबागा बहरत आहेत. शेततळी घेऊन आधुनिक शेती करण्याचा प्रयत्न कडा परिसरात होत आहे.
दुष्काळी भाग असलेला आष्टी तालुक्यात जिथे पिण्याच्या पाण्यासाठी पायपीट करावी लागायची तिथे शेतीला पाणी आणायचे कोठून असा प्रश्न कायम समोर असल्याने आणि पावसाचे प्रमाण कमी होत गेल्याने शेतकरी आर्थिक अडचणीत सापडला होता. फळबाग शेती व हंगामी पिके घेताना पाण्याची चिंता भेडसावयची; पण कृषी विभागाच्या योग्य सल्ल्याने तालुक्यातील २,२९१ शेतकऱ्यांनी शेततळी खोदून या माध्यमातून शाश्वत शेती करण्यासाठी शेततळ्याचा मार्ग काढला. आता शेतकरी यामुळे अडचणीतून थोड्याफार प्रमाणात का होईना बाहेर पडताना दिसत आहे.
आष्टी तालुक्यातील शेतकरी शेतीला किंवा फळबागेला पाणी नसल्याने हंगामी पिकाला महत्त्व देऊन शेती करायचे; पण कृषी विभागाने वेळोवेळी जनजागृती करून विविध योजनांच्या माध्यमातून शेततळी खोदून त्याचा लाभ घेण्याचे आवाहन केल्याने मागील पाच वर्षांत तालुक्यातील २,२९१ एवढी शेततळे शेतकऱ्यांनी खोदून पाणीटंचाईवर मात करून पाच हजार एकर क्षेत्रावरील फळबागांची शेती उत्तम प्रकारे जोपासली आहे.
एरवी पाण्याअभावी फळबागा जळून जायच्या; पण आता पाण्याअभावी फळबागांना कसलीच भीती राहिली नाही. शेतकऱ्यांना शेततळ्याच्या माध्यमातून शाश्वत शेतीचा मार्ग मिळाला असल्याचे दिसून येत आहे. भविष्यात शेतकऱ्यानी मोठ्या प्रमाणावर शेततळे खोदून पाण्याचा साठा करून शेतशिवार बहरण्यासाठी पुढे यायला हवे. त्याचबरोबर पावसाळी हंगामातील पाण्याने शेततळी भरून घ्यायला हवीत.
कृषी विभागाचे वेळोवेळी सहकार्य आहेच. काही अडचण भासल्यास कृषी विभागाचा सल्ला घ्यावा, असे आवाहनदेखील आष्टी तालुका कृषी अधिकारी राजेंद्र सुपेकर यांनी केले आहे.
तालुक्यात दुष्काळी परिस्थितीवर मात करण्यासाठी कृषी विभागाच्या सल्ल्यानुसार शेततळे उभारले. आज त्यामुळे कसलीच पाणीटंचाई भासत नसल्याचे व शेतीला पाणी भरपूर देता येत असल्याचे मातावळी येथील शेतकरी रामदास बांगर यांनी ‘लोकमत’ला सांगितले.
या योजनेतून खोदलेले शेततळे व शेततळ्याची संख्या
सामूहिक शेततळे ४७५
अस्तीकरणासहित शेततळे ३८
फक्त अस्तीकरण शेततळे ४१
फक्त खोदकाम केलेले शेततळे ४७६
मागेल त्याला शेततळे योजनेंतर्गत शेततळे १,२६१
===Photopath===
160421\20210410_102332_14.jpg