बीड : आठवडाभरापासून कंत्राटी नर्सेस चांगल्याच वादग्रस्त ठरत आहेत. जिल्हा रुग्णालयातील नर्सेसचे प्रकरण शांत होत नाही तोच अंमळनेर प्राथमिक आरोग्य केंद्रातील एका नर्सने नवा कारनामा केला आहे. ४५ वर्षांखालील कोरोना लसीकरण असतानाही केवळ ओळखीच्यांना 'अर्थ'साहाय्य करीत दोघांना लस टोचल्याचे रविवारी समोर आले आहे. याबाबत संबंधित नर्सला नोटीस बजावली असून कारवाईची टांगती तलवार तिच्यावर आहे.
सध्या कोरोना लसीचा सर्वत्र तुटवडा जाणवत आहे. लस कमी येत असल्याने बीड आरोग्य विभागाने १८ ते ४५ वयोगटातील लसीकरण बंद ठेवलेले आहे. केवळ ४५ वर्षांवरील लोकांना लस दिली जात आहे; परंतु अंमळनेर आरोग्य केंद्रातील एका कंत्राटी नर्सने स्वत:चा मनमानी कारभार करीत नियमबाह्य लसीकरण केल्याचे उघड झाले आहे. हा प्रकार समजताच या भागाचे जिल्हा परिषद सदस्य माउली जरांगे यांनी तालुका आरोग्याधिकारी व जिल्हा आरोग्य अधिकाऱ्यांकडे तक्रार केली. याबाबत टीएचओंनी याबाबतचा अहवाल डीएचओंकडे पाठविला आहे. आता या नर्सला नोटीस बजावण्यात आली असून २४ तासांत खुलासा घेऊन अहवाल टीएचओंच्या अभिप्रायासह सादर करण्याच्या सूचना जिल्हा आरोग्याधिकारी डॉ. आर. बी. पवार यांनी दिल्या आहेत. आता ही नर्स चांगलीच वादाच्या भोवऱ्यात सापडली असून, तिच्यावर कारवाईची टांगती तलवार आहे. आता डीएचओ काय कारवाई करतात, याकडे लक्ष लागले आहे. याबाबत जिल्हा परिषद सदस्य माउली जरांगे म्हणाले, अंमळनेर आरोग्य केंद्रातील प्रकाराबाबत मी आपल्याला सायंकाळी सहा वाजता सविस्तर सांगेन. मात्र रात्री आठ वाजेपर्यंत त्यांनी संपर्क साधला नाही.
...
नर्सेसबद्दल तीव्र रोष
मृतदेह पळविला म्हणून नातेवाइकांवर गुन्हा दाखल करणे, ऑक्सिजन पुरवठ्यात जबाबदारी झटकणाऱ्या नर्सेस अगोदरच वादात सापडलेल्या आहेत. आता ग्रामीण भागातील नर्सेसचेही कारनामे समोर येत आहेत. विशेष म्हणजे या सर्व वादग्रस्त नर्सेस कंत्राटी आहेत. यामुळे प्रामाणिकपणे काम करणाऱ्यांची बदनामी होत असून त्यांना नागरिकांच्या रोषाला बळी पडावे लागत आहे.
--
संबंधित नर्सबद्दल तक्रार आली आहे. टीएचओंकडून अहवाल मागविला आहे. नर्सला नोटीस बजावली असून तिला २४ तासांत खुलासा सादर करण्यास सांगितले आहे. दोषी असल्यास कारवाई केली जाईल.
-डॉ. आर. बी. पवार, जिल्हा आरोग्याधिकारी, बीड.