बीड : गेवराई तालुक्यातील शिंदेवाडी येथे सामाईक विहिरीतील पाण्यावरून भावकीत तुंबळ हाणामारी झाली. याप्रकरणी गेवराई पोलीस ठाण्यात सख्ख्या भावाच्या फिर्यादीवरून परस्परविरोधी नऊजणांवर गुन्हे दाखल करण्यात आले आहेत.
शिंदेवाडी येथील बाळाभाऊ सखाराम शेंडगे यांच्या फिर्यादीवरून ते शेतातील सामाईक विहिरीतील पाण्याची मोटार सुरू करण्यासाठी गेले होते. यावेळी मोटार सुरू करायची नाही अशी भांडणाची कुरापत काढून शिवीगाळ केली व पऱ्हाटी उपटण्याच्या चिमट्याने मारहाण केली. यात शेंडगे हे गंभीर जखमी झाले. याप्रकरणी गेवराई पोलीस ठाण्यात शीतल बाबूराव शेंडगे, रामा बाबूराव शेंडगे, महानंदा बाबूराव शेंडगे, बाबूराव सखाराम शेंडगे, यांच्यावर गुन्हा दाखल करण्यात आला आहे.
तर दुसऱ्या गुन्ह्यात महानंदा बाबूराव शेंडगे यांच्या फिर्यादीवरून शेतातील सामाईक विहिरीचे पाणी घेण्यावरून बाळाभाऊ सखाराम शेंडगे दारू पिऊन भांडण करतो व दारूच्या बाटल्या शेतात का फेकतो, अशी विचारणा केल्यामुळे शिवीगाळ करून, कुऱ्हाडीने मारहाण केली. या मारहाणीत फिर्यादी गंभीर जखमी झाल्या होत्या. याप्रकरणी गेवराई पोलीस ठाण्यात बाळाभाऊ सखाराम शेंडगे, भिमा बाळाभाऊ शेंडगे, सखाराम बाळाभाऊ शेंडगे, चांदगेव सुदाम माने, राजेभाऊ सखाराम शेंडगे यांच्यावर गुन्हा दाखल करण्यात आला आहे. या प्रकरणाचा पुढील तपास पो.हे. शेळके हे करत आहेत.