केजमध्ये चाकूचा धाक दाखवून निवृत्त एसटी चालकास पत्नीसमोरच लूटले; लाखोंचे दागिने लंपास

अंबाजोगाईनंतर आता केजमध्ये प्रवाशांना टार्गेट करणारी टोळी सक्रिय, हेल्मेटधारी चोरट्यांचा हैदोस

- मधुकर सिरसट
केज (बीड): राज्य परिवहन मंडळातून आयुष्यभर प्रवाशांची सुरक्षित सेवा करून नुकतेच निवृत्त झालेले शिवाजी शिवराम भिसे यांना स्वतःच्याच तालुक्यात लुटीचा सामना करावा लागला. बुधवारी सकाळी सव्वा दहा वाजेच्या सुमारास कळंब-सुर्डी रस्त्यावर दोन अज्ञात चोरट्यांनी चाकूचा धाक दाखवून भिसे दाम्पत्याकडील अडीच लाख रुपयांचे सोन्याचे दागिने लुटून नेल्याची धक्कादायक घटना घडली आहे.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

नेमकी घटना काय?
मिळालेल्या माहितीनुसार, सुर्डी (सोनेसांगावी) येथील मूळ रहिवासी असलेले शिवाजी भिसे हे आपल्या पत्नीसह दुचाकीवरून (MH 25 V 4683) कळंबहून गावी जात होते. सुर्डी फाटा ओलांडल्यानंतर काही अंतरावरच पाठीमागून आलेल्या एका दुचाकीने त्यांना ओव्हरटेक करून रस्ता अडवला. काही कळायच्या आतच दुचाकीवरील दोन हेल्मेटधारी तरुणांनी चाकू काढून त्यांना जीवे मारण्याची धमकी दिली. पत्नीसमोरच भिसे यांच्या गळ्यातील २ तोळ्याचे सोन्याचे लॉकेट आणि बोटातील ५ ग्रॅमची अंगठी असा एकूण अडीच लाखांचा ऐवज हिसकावून चोरट्यांनी पोबारा केला.

पोलीस यंत्रणेसमोर मोठे आव्हान
घटनेची माहिती मिळताच सहाय्यक पोलीस निरीक्षक मच्छिंद्र शेंडगे यांनी पथकासह घटनास्थळी धाव घेतली. परिसरातील रस्त्यांवर नाकाबंदी करण्यात आली असून गुन्हे अन्वेषण विभागही तपासात सामील झाला आहे. मात्र, सीसीटीव्ही फुटेज आणि चोरट्यांचे वर्णन मिळवणे पोलिसांसाठी मोठे आव्हान ठरत आहे.

१२ दिवसांतील दुसरी घटना; नागरिकांमध्ये दहशत
विशेष म्हणजे, अवघ्या १२ दिवसांपूर्वीच अंबाजोगाईचे व्यापारी श्रीराम ढगे यांनाही अशाच पद्धतीने ४ लाख १० हजारांना लुटण्यात आले होते. या पहिल्या घटनेचा छडा लागण्यापूर्वीच दुसरी मोठी लूट झाल्याने पोलिसांच्या कार्यक्षमतेवर प्रश्नचिन्ह निर्माण झाले असून, परिसरात भीतीचे वातावरण आहे.