स्वतःचे EV चार्जिंग स्टेशन सुरू करा, महिन्याला होईल लाखोंची कमाई; अर्ज कुठे करावा लागेल?

EV Charging Station: भारतात इलेक्ट्रिक वाहनांची मागणी झपाट्याने वाढत आहे.

EV Charging Station: भारतात इलेक्ट्रिक वाहनांचा (EV) वापर झपाट्याने वाढत असून, त्यासोबतच EV चार्जिंग स्टेशन व्यवसायालाही मोठी मागणी निर्माण झाली आहे. रिकामी जमीन असलेल्या आणि स्थिर उत्पन्नाचा व्यवसाय शोधणाऱ्या नागरिकांसाठी हा एक फायदेशीर पर्याय ठरू शकतो. एकदा सेटअप केल्यानंतर या व्यवसायातून नियमित उत्पन्न मिळण्याची संधी आहे.

चार्जिंग स्टेशन सुरू करण्यासाठी आवश्यक अटी

EV चार्जिंग स्टेशन सुरू करण्यासाठी किमान ५० ते १०० चौरस मीटर मोकळी जागा आवश्यक असते. ही जमीन स्वतःच्या नावावर किंवा किमान १० वर्षांच्या भाडेपट्ट्यावर असणे गरजेचे आहे. तसेच २४ तास वीजपुरवठा अनिवार्य असून वन विभाग, अग्निशमन दल आणि महापालिकेकडून आवश्यक परवानग्या घ्याव्या लागतात. याशिवाय वाहनांच्या पार्किंगची सुविधा, पिण्याचे पाणी, शौचालय, विश्रांती व्यवस्था आणि अग्निसुरक्षा सुविधा उपलब्ध असणे आवश्यक आहे.

या व्यवसायासाठी अर्ज करण्यासाठी दोन पर्याय उपलब्ध आहेत. पहिला म्हणजे राष्ट्रीय महामार्ग किंवा परिवहन विभागामार्फत थेट अर्ज करणे. दुसरा पर्याय म्हणजे खासगी कंपन्यांच्या फ्रँचायझीद्वारे व्यवसाय सुरू करणे. या पद्धतीत तांत्रिक सहाय्य आणि सेटअपसाठी मार्गदर्शन मिळते, त्यामुळे नवशिक्यांसाठी हा पर्याय सोपा मानला जातो.

EV चार्जिंग स्टेशन सुरू करण्यासाठी सुमारे १५ ते २० लाख रुपयांची गुंतवणूक लागते, जी स्टेशनच्या क्षमतेनुसार बदलू शकते. या व्यवसायातील उत्पन्न हे वाहनांच्या चार्जिंगवर अवलंबून असते. अधिक वाहनांची ये-जा असेल तर उत्पन्न वाढते. मध्यम क्षमतेच्या स्टेशनमधून दररोज चांगली कमाई होऊन महिन्याला लाखो रुपयांपर्यंत उत्पन्न मिळू शकते.

मात्र, या व्यवसायात कर्मचारी वेतन, देखभाल आणि वीज खर्च यांसारखे नियमित खर्चही लक्षात घेणे आवश्यक आहे. योग्य नियोजन आणि व्यवस्थापन केल्यास EV चार्जिंग स्टेशन हा दीर्घकालीन स्थिर उत्पन्न देणारा व्यवसाय ठरू शकतो.