अमरावती : महापालिका क्षेत्रात लॉकडाऊन घोषित असताना नांदगावपेठ नजीकच्या बिझीलँड व्यापारी संकुलात काही दुकानदारांनी मंगळवारी प्रतिष्ठाने उघडण्याचा प्रयत्न केला. मात्र, त्यांना पोलिसांनी हुसकावले. दुकान उघडणाऱ्या एका व्यावसायिकावर पोलिसांत गुन्हा दाखल करण्यात आला, तर महसूल प्रशासनाने दोन हजारांचा दंड आकारला.
पोलीस सूत्रांनुसार, प्रिन्स गारमेंटचे गोवर्धन राधाकिसन चांदवाणी (४५, सिंधी कॅम्प, अमरावती) असे गुन्हा दाखल झालेल्या व्यापाऱ्याचे नाव आहे. जिल्हाधिकारी शैलेश नवाल यांची सोमवारी काही व्यावसायिकांच्या शिष्टमंडळाने भेट घेत ‘लॉकडाऊन’ हटविण्याची मागणी केली होती. प्रशासनाने ‘लॉकडाऊन’ हटविला नाही, तर व्यावसायिक मंगळवारपासून दुकाने सुरू करतील, असे या शिष्टमंडळाने जिल्हाधिकाऱ्यांना बजावले होते. त्यानुसार मंगळवारी नागपूर महामार्गालगतच्या नांदगाव पेठ येथील बिझीलँड व्यापारी संकुलात दुकाने उघडण्यासाठी येणाऱ्या व्यापाऱ्यांना पोलीस, महसूल पथकाने परतवून लावले. जिल्ह्यात आपत्ती व्यवस्थापन कायदा लागू असून, जिल्हाधिकाऱ्यांच्या आदेशाचे पालन न केल्यास कठोर कारवाईला सामोरे जावे लागेल, असे पोलीस पथकाने व्यापाऱ्यांना सांगितले. दुकाने उघडल्यास आपत्ती व्यवस्थापन कायदा भादंविचे अंतर्गत गुन्हे दाखल होतील, असा समज देण्यात आला. त्यानंतर व्यावसायिक आल्यापावली परतले. पोलीस, महसूल विभागाच्या संयुक्त कारवाईने व्यावसायिकांचे दुकाने सुरू करण्याचे मनसुबे हाणून पाडले.
-----------
एका दुकानदाराने दुकान उघडले होते. त्याचाविरुद्ध आपत्ती व्यवस्थापन कायदा अंतर्गत भादंविचे १८८ गुन्हे दाखल केले आहे. मात्र, इतर व्यावसायिक दुकाने उघडण्यासाठी आले होते. त्यांना जिल्हाधिकाऱ्यांच्या आदेशाबाबत सविस्तर माहिती दिली. ती त्यांना पटली आणि व्यावसायिक परत गेले.
- अरुण कुळकर्णी, ठाणेदार, नांदगाव पेठ.
----------------
महसूल पथकाने मंगळवारी बिझीलँड व्यापारी संकुलाची पाहणी केली. केवळ एक दुकान सुरू होते. त्यामुळे ग्रामपंचायतीने दोन हजारांच्या दंडाची पावती दिली आहे. लॉकडाऊनमध्ये कापड दुकाने सुरू करता येणार नाही, असे स्पष्ट कळविले आहे.
- संतोष काकडे, तहसीलदार, अमरावती.