पेरणी करताना ट्रॅक्टर विहिरीत कोसळले, शेतकऱ्याचा मृत्यू

Amravati : विहिरीतील पाण्याचा उपसा करून मृतदेह बाहेर काढण्यात यश

तिवसा (अमरावती) : शेतात सोयाबीनची पेरणी करीत असलेले ट्रॅक्टर अचानक शेतातील विहिरीत कोसळल्याने त्यावरील चालकाचा मृत्यू झाला. हा अपघात शनिवारी सकाळी ८:३० वाजता वऱ्हा शिवारात घडला. संजय देवीदास भाकरे (४३, रा. वऱ्हा), असे मृताचे नाव आहे.

संजय भाकरे हे आपल्या स्वमालकीच्या मिनी ट्रॅक्टरसह गावातीलच वाघाडे यांच्या शेतात पेरणीसाठी गेले होते. पेरणी करीत असताना अनवधानाने जमिनीशी समांतर असलेल्या ३५ फूट खोल विहिरीत ट्रॅक्टर कोसळला. संजय भाकरे हे ट्रॅक्टरखाली दबल्याने विहिरीतील पाण्यामुळे जीव गुदमरून त्यांचा जागीच मृत्यू झाला. घटनेची माहिती मिळताच गावातील नागरिकांनी विहिरीकडे धाव घेतली. काही नागरिकांनी विहिरीत उतरून मृतदेह काढण्याचा प्रयत्न केला; परंतु पाण्याची पातळी जास्त असल्याने मृतदेह काढता आला नाही. अखेर विहिरीतील पाण्याचा उपसा करून मृतदेह बाहेर काढण्यात आला.

संजय भाकरे यांच्या पश्चात पत्नी व दोन मुले आहेत. त्यांच्या आकस्मिक मृत्यूने परिसरात हळहळ व्यक्त होत आहे. घटनास्थळी पोहोचून कुऱ्हा पोलिसांनी पंचनामा केला व आकस्मिक मृत्यूची नोंद घेतली.