इंजिनिअरिंगच्या 'त्या' विद्यार्थिनीचा खून प्रेम प्रकरणातून, पोस्टमार्टेम रिपोर्टमध्ये काय? मित्राविरुद्ध गुन्हा दाखल

Amravati News: 'आपण मित्रासह ४ जून रोजी रात्री तिच्या रूमवर पोहोचलो असता, ती गळफास घेतलेल्या स्थितीत दिसली. तिला आपणच खाली उतरविले', असे बयाण प्रतीकने दिले होते.

अमरावतीमधील गाडगेनगर ठाण्याच्या हद्दीत इंजिनिअरिंगच्या विद्यार्थिनीच्या मृत्यूप्रकरणी शुक्रवारी खुनाचा गुन्हा दाखल करण्यात आला. मृत तरुणीच्या बहिणीने त्याबाबत तक्रार नोंदविली. त्याआधारे, पोलिसांनी मृत तरुणीचा मित्र प्रतीक शरद हिवसे (२४, लक्ष्मीनगर, अमरावती) याच्याविरुद्ध खुनाचा गुन्हा नोंदविला. त्याला ताब्यात घेण्यात आले आहे. या हत्याप्रकरणाला प्रेमाची किनार असल्याचे सीडीआरवरून स्पष्ट झाले.

'लोकमत'चं WhatsApp चॅनल फॉलो करा!

'आपण मित्रासह ४ जून रोजी रात्री तिच्या रूमवर पोहोचलो असता, ती गळफास घेतलेल्या स्थितीत दिसली. तिला आपणच खाली उतरविले', असे बयाण प्रतीकने दिले होते. पोलिसांनी तिने आत्महत्या केल्याची नोंद घेतली. मात्र मृताच्या मस्तिष्कात इंटर्नल इंज्युरी असल्याचे निरीक्षण पीएम रिपोर्टमध्ये नोंदविले गेले. सबब, पोलिसांनी तपासाची दिशा हत्येकडे वळविली. 

वाचा >>सासू-सासरे अन् पतीसह तिनं मुलांनाही सोडलं नाही! कुटुंबाला 'स्लो पॉयझन' देणाऱ्या महिलेची 'अशी' झाली पोलखोल

दरम्यान, शुक्रवारी दुपारी मृत मुलीच्या बहिणीने प्रतीक हिवसे यानेच आपल्या बहिणीचा खून केला, अशी तक्रार दिली. काही दिवसांपूर्वीच तिने आपली प्रतीकसोबत मित्र म्हणून ओळख करून दिली होती, असे तिने तक्रारीत म्हटले आहे.

संशयित प्रतीकने खुनाची कबुली दिलेली नाही. त्यामुळे मृत तरुणीच्या मस्तिष्कात इंटर्नल इंज्युरी कशी झाली, तिच्या गळ्यावर चट्टे वा अन्य खुणा कशाने आल्या, ते शोधण्याचे आव्हान गाडगेनगर पोलिसांसमोर आहे.

गावकऱ्यांच्या संतापाचा कडेलोट

आपल्या गावातील विद्यार्थिनीचा मृत्यू झाल्याचे कळताच संबंधित गावातील अनेकांनी जिल्हा सामान्य रुग्णालय गाठून शवविच्छेदन करणाऱ्या डॉक्टरांना विचारणा केली. तिचा मृत्यू झाल्यानंतर तिला फासावर लटकविण्यात आले, असे डॉक्टरांनी सांगताच त्यांच्या संताप व दुःखावेगाचा कडेलोट झाला.