---------------------------
जिल्हा सामान्य रुग्णालयात अकारण जमाव
अमरावती : जिल्हा सामान्य रुग्णालयात अकारण जमाव करणाऱ्या नऊ जणांविरुद्ध शहर कोतवाली पोलिसांनी १० मे रोजी गुन्हा नोंदविला. यामध्ये सागर यादव, ललित यादव, सूरज तिवारी, पवन श्रीवास्तव, सचिन उईके व तीन ते चार महिलांचा समावेश आहे. त्यांना समज देऊन सोडण्यात आले.
---------------------
संचारबंदीचे उल्लंघन, दोघांविरुद्ध गुन्हा
अमरावती : संचारबंदीच्या काळात एमएच २७ बीएच ८६२७ क्रमांकाच्या दुचाकीने विनामास्क फिरताना आढळलेल्या अब्दुल हाफिज अब्दुल गफार (३५, रा. अकबरनगर) याच्याविरुद्ध खोलापुरी गेट पोलिसांनी कारवाई केली. एमएच २७ बीवाय ८९७९ क्रमांकाची दुचाकी घेऊन फिरणारा रवि चंदुलाल खत्री (४०, रा. केवल कॉलनी) याच्याविरुद्ध गाडगे नगर पोलिसांनी कारवाई केली.
--------------------------
चिंचपूर येथील युवकाची विष प्राशून आत्महत्या
मंगरूळ दस्तगीर : नजीकच्या चिंचपूर येथील हर्षल बंडुजी तुळसकर (२१) या युवकाने विष प्राशन करून आत्महत्या केली. त्याला उपचारासाठी प्रतीक खोडके (रा. गोपालनगर) यांनी डॉ. पंजाबराव देशमुख स्मृती वैद्यकीय महाविद्यालयात दाखल केले होते. पोलिसांनी याप्रकरणी सोमवारी मर्ग दाखल केला.
------------------
अवैध मद्य बाळगणाऱ्या युवकविरुद्ध गुन्हा
भातकुली : हरताळा ते कोल्हापूर मार्गावर भातकुली पोलिसांनी गोविंद रमेश चव्हाण (३९, रा. हरताळा) याची तपासणी केली. त्याच्याकडे २२ नग देशी दारूच्या ११०० रुपयांच्या पावट्या आढळल्या. भातकुली पोलिसांनी मंगळवारी दुपारी कलम ६५ ई अन्वये गुन्हा नोंदवून त्याला समाजपत्रावर सोडले.
--------------------
संचारबंदीचे उल्लंघन, भातकुलीत गुन्हा
भातकुली : जिल्हाधिकाऱ्यांनी लागू केलेल्या संचारबंदीचे उल्लंघन केल्याप्रकरणी भातकुली पोलिसांनी गजानन विनायकराव मोहोड (३९, रा. आसरा), शुभम अजाबराव मानकर (२२, रा. सायत) व आशिष सहदेवराव डोंगरे (२२, रा. सायत) यांच्याविरुद्ध कारवाई केली. मंगळवारी दुपारी त्यांच्याविरुद्ध कलम १८८, २६९ अन्वये गुन्हा नोंदविण्यात आला.
---------------
विनामास्क आढळलेल्या युवकांविरुद्ध विरुद्ध गुन्हा
अमरावती : फ्रेजरपुरा पोलीस ठाण्याच्या हद्दीत विनामास्क आढळलेल्या राकेश सुनील पांडे (४२, रा. फ्रेजरपुरा) व संदीप शंकर चौधरी (३२, रा. ग्रीन पार्क कॉलनी) यांच्याविरुद्ध पोलिसांनी भादंविचे कलम १८८ सह साथरोग प्रतिबंधक कायद्यान्वये गुन्हा दाखल केला. सोमवारी सायंकाळी ही कारवाई करण्यात आली.
-----------------
थुंकण्यास हटकले म्हणून महिलेला मारहाण
अमरावती : थुंकण्यास हटकले म्हणून कल्याणनगर येथील २५ वर्षीय महिलेला येथीलच नीलेश पिवाल व तीन महिलांनी शिवीगाळ करून मारहाण केली. परिसरातील महिला मध्यस्थीला आल्या असता, त्यांनाही पाहून घेण्याची धमकी देण्यात आली. याप्रकरणी फ्रेजरपुरा पोलिसांनी सोमवारी भादंविचे कलम २९४, ३२३, ३४ अन्वये गुन्हा दाखल केला.
-------------------
सुकळी शिवारातून महावितरणचे साहित्य लंपास
अमरावती : नागपुरी गेट पोलीस ठाण्याच्या हद्दीतील सुकळी शिवारातील महावितरणच्या डीबीमधील तांब्याचा बस बार, एचआरसी फ्युज, लघुदाब वाहिनीचा १४०० मीटर तार असे ३० हजारांचे साहित्य अज्ञात चोरट्याने लंपास केले. याप्रकरणी रहाटगाव ग्रामीण महावितरण केंद्राचे वरिष्ठ तंत्रज्ञ अतुल बोकाडे (४८) यांनी तक्रार दाखल केली. पोलिसांनी भादंविचे कलम ३७९ सह कलम १३६ विद्युत अधिनियम २००३ अन्वये गुन्हा नोंदविला.