अमरावती : जिल्हा परिषदेच्या माध्यमातून जिल्ह्यात सन २०१९-२० या कालावधीत राबविण्यात आलेल्या आर.आर. (आबा) पाटील सुंदर गाव योजनेचे पुरस्कार १६ फेब्रुवारी रोजी मुख्य कार्यकारी अधिकारी अमोल येडगे यांनी जाहीर केले. यामध्ये १३ तालुक्यांत प्रत्येकी एक, तर नांदगाव खंडेश्वर तालुक्यात दोन गावांना विभागून अशा १५ गावांना तालुकास्तरावर, तर दोन गावांना संयुक्तरीत्या जिल्हास्तरावरचा पुरस्कार जाहीर झाला आहे.
जिल्ह्यातील १४ तालुक्यांतील ८४० ग्रामपंचायतींपैकी अधिक गुण प्राप्त करणाऱ्या २१० ग्रामपंचायतींची गटविकास अधिका०यांमार्फत क्रॉस चेकिंग करण्यात आली होती. त्यानंतर ग्रामपंचायतींचे अहवाल जिल्हा परिषदेतील पंचायत विभागाकङे सादर करण्यात आले होते. आर.आर. (आबा) पाटील सुंदर गाव पुरस्कार योजनेच्या तालुकास्तरीय समितीकडून गुणांकन व मूल्यांकन करण्यात आले होते. त्यानंतर जिल्हास्तरीय समितीमार्फत गाव पाहणी अभिलेख्यांची व गुणांची पडताळणी करून ग्रामपंचायतींना पात्र ठरविण्यात आले होते. तालुकास्तरावर १५ ग्रामपंचायती पात्र ठरल्या. यात नांदगाव खंडेश्वर तालुक्यातील पुसनेर व मोखड या दोन ग्रामपंचायतींना पुरस्कार संयुक्तरीत्या जाहीर करण्यात आला. १४ तालुक्यांतून अचलपूर तालुक्यातील सावळी दातुरा आणि चांदूर बाजार तालुक्यातील गाेविंदपूर या दोन ग्रामपंचायतींना जिल्हास्तरावरचा पुरस्कार संयुक्तरीत्या जाहीर झाला. तालुकास्तरावर पुरस्कारप्राप्त ग्रामपंचायतींना प्रत्येकी १० लाखांचा आणि जिल्हास्तरावर ४० लाखांचा रोख स्वरूपात पुरस्कार दिला जाणार असल्याची माहिती पंचायत विभागाचे उपमुख्य कार्यकारी अधिकारी दिलीप मानकर यांनी दिली.
बॉक्स
तालुकास्तरावर पुरस्कारप्राप्त ग्रामपंचायती
रेवसा (अमरावती). सोमवारखेडा (भातकुली). पुसनेर व मोखड (नांदगाव खंडेश्वर). जावरा (तिवसा). लेहगाव (मोर्शी). सावंगा (वरूड). कापूसतळणी (अंजनगाव सुर्जी). दुनी (धारणी). गौलखेडा बाजार (चिखलदरा). शिंगणापूर (दर्यापूर). गोविंदपूर (चांदूर बाजार). सावळी दातुरा (अचलपूर). सावंगी संगम (चांदूर रेल्वे). कामनापूर घुसळी (धामणगाव रेल्वे).
जिल्हास्तरावर पुरस्कारप्राप्त ग्रामपंचायती
सावळी दातुरा (अचलपूर) व गाेविंदपूर (चांदूर बाजार)
कोट
जिल्ह्यातील १४ तालुक्यांतील गावांची तपासणी केली असता, दोन ग्रामपंचायती अव्वल आढळल्या. यंदा सर्वच गावांना स्पर्धेत सहभाग घेण्याचे आवाहन केले होते. याला चांगला प्रतिसाद लाभला.
- अमोल येडगे, मुख्य कार्यकारी अधिकारी, जिल्हा परिषद