अमरावती : मालमत्ता कर थकबाकीदारांना दिलासा देण्याच्या दृष्टीने २५ जानेवारी ते १५ मार्च २०२१ या कालावधीकरिता 'मालमत्ता कर अभय योजना' लागू करण्याचा निर्णय महापालिकेच्यावतीने घेतला. याचा लाभ घेण्याचे आवाहन महापौर चेतन गावंडे यांनी केले आहे.
लॉकडाऊनमुळे नागरिकांना आर्थिक अडचणींना सामोरे जावे लागत आहे. यामुळे महापालिकेचा मुख्य महसूल स्रोत असलेल्या मालमत्ता करांची वसुलीही कमी झालेली आहे. यामुळे नागरिकांना आर्थिक दिलासा देणारी ही योजना जाहीर करण्यात आलेली आहे. थकबाकी असलेल्या नागरिकांनी मालमत्ता करांची थकीत रक्कम अधिक २० टक्के दंडात्मक रक्कम भरणा केल्यास त्यांना ८० टक्के इतक्या मोठ्या प्रमाणात दंडात्मक रकमेवर सूट मिळणार आहे.
या अभय योजनेस कोणत्याही प्रकारची मुदतवाढ दिली जाणार नसून मालमत्ता करांची रक्कम व ८० टक्के सवलत वगळून उर्वरित २० टक्के दंडात्मक रक्कम एकाचवेळी भरावयाची आहे. टप्प्याटप्प्याने भरणा केलेल्या रकमेस अभय योजना लागू राहणार नाही. असे महापौरांनी स्पष्ट केले. अभय योजना सुरू होण्यापूर्वी किंवा समाप्तीनंतर भरणा केलेल्या कोणत्याही रकमांना अभय योजना लागू राहणार नाही, याची नागरिकांनी विशेष नोंद घ्यावी. अभय योजना सुरू होण्यापूर्वी भरणा केलेल्या कोणत्याही रकमेच्या परताव्यासाठी अभय योजनेंतर्गत दावा करता येणार नाही.
बॉक्स
पाचही झोन कार्यालयांत सुविधा
अभय योजनेंतर्गत सर्व पाचही झोन कार्यालयांच्या ठिकाणी तसेच आपल्या वसुली लिपिकांमार्फत रोख / धनादेश / धनाकर्ष याव्दारे रक्कम भरणा करण्याची सुविधा उपलब्ध असणार आहे. नागरिकांनी दिलेले धनादेश अभय योजनेच्या कालावधीत न वटल्यास अर्जदारास अभय योजनेचा लाभ मिळणार नाही. याशिवाय महापालिकेच्या www.amtcorp.org या वेबसाईटवर ऑनलाईन पध्दतीने भरणा नागरिकांना करता येईल.