संगणक परिचालक संतप्त, ऑनलाईनची कामे वाढली, गटविकास अधिकाऱ्यांना दिले निवेदन
फोटो - चांदूर रेल्वे २९ एस
चांदूर रेल्वे : ग्रामपंचायतींच्या संगणक परिचालकांच्या वेतनात १४ जानेवारी रोजीच्या शासननिर्णयानुसार एक हजार रुपयांची वेतनवाढ करण्यात ाआली. ही वाढ नामंजूर असल्याने ती नकोच, अशा आशयाचे निवेदन चांदूर रेल्वे येथील संगणक परिचालक संघटनेने सहायक गटविकास अधिकारी सुधाकर उमक यांना दिले आहे.
निवेदनानुसार, राज्यात सुमारे २० हजार संगणक परिचालक कार्यरत आहेत. २०११ मध्ये संगणकीकृत ग्रामीण महाराष्ट्र (संग्राम) व २०१६ मध्ये याच संगणक परिचालकाना ‘आपले सरकार सेवा केंद्र’ अंतर्गत केंद्रचालक हे पद देऊन नव्याने नियुक्ती देण्यात आली. शासननिर्णयानुसार एका केंद्रचालकासाठी दरमहा सहा हजार रुपये, स्टेशनरीकरिता २७०० रुपये, प्रशिक्षणाकरिता १३०० रुपये, व्यवस्थापनाकरिता ४५० व सेवा कर १८०० रुपये असे एकूण १२२५० रुपये कंपनी घेते. ग्रामपंचायत वर्षाकाठी १ लाख ४७ हजार रुपये कंपनीला देते. यातून केंद्रचालकाचे नियमित सहा हजार रुपये वेतन करणे अपेक्षित असताना, टीडीएसच्या नावाखाली काही रक्कम कापली जाते. आता सात हजार रुपये एकत्रित वेतन मिळेल, असे शासनाकडून जाहीर करण्यात आले. संगणक परिचालकांच्या जखमेवर याद्वारे मीठ चोळण्यात आल्याचे संघटनेने नमूद केले.
निवेदन देताना सचिन पाटील, मंजूषा देशमुख, मयूरी ठाकरे, प्रीती नखाते, वैभव जळीत, आशिष चौधरी, अक्षय गडलिंग, रतन पारवे, विशाल खंडारे, सूरज सरोदे, तुकाराम पांडव, संदीप किन्हीकर, गोपाल घाटोळ व इतर परिचालक उपस्थित होते.
———————
कोरोनाच्या महामारीत तुटपुंज्या पगारावर संसाराचा गाडा चालवणे कठीणच. त्यातही चार-चार महिने पगार होत नाहीत. यामुळे कर्जबाजारी होऊन उपासमार होणे कोणीही नाकारू शकत नाही.
- आशिष चौधरी, संगणक परिचालक
———————
प्रामाणिकपणे काम करूनसुद्धा आम्हाला वेळेवर मानधन दिले जात नाही. प्रशासनाने सांगितलेली सर्व कामे संगणक परिचालक वेळेवर करीत आहेत. मात्र, रोहयोत काम करणाऱ्या मजुरापेक्षाही आम्हाला वेतन कमी आहे.
- मंजुषा देशमुख, सचिव,संगणक परिचालक संघटना, चांदूर रेल्वे
———————
संगणक परिचालक जोड
छाया - टाकरखेडा संभू
भातकुली पंचायत समितीत शासननिर्णयाची होळी
टाकरखेडा संभू : भातकुली पंचायत समिती कार्यालयासमोर संगणक परिचालकांनी शासननिर्णयाची होळी केली. घोषणाबाजी व निदर्शनांनी परिसर दणाणून सोडला. यावेळी तालुका उपाध्यक्ष संदीप टपके, प्रवीण तायडे, सुशांत लुंगे, राहुल सिरसाठ, पल्लवी राऊत, वीणा गोंडाणे, निरंजन बोंडे
आदींनी गटविकास अधिकारी सुरेश थोरात यांना निवेदन दिले.