आयपीएस जालिंदर सुपेकर यांचे अमरावतीशी ‘फ्रॉड’ कनेक्शन

मध्यवर्ती कारागृहात सात जणांचे केले होते निलंबन : खासगी साेहळ्यात उपस्थिती, मग कारागृहात भेट कशासाठी?

गणेश वासनिक 
अमरावती : पुणे येथील वैष्णवी हगवणे आत्महत्याप्रकरणी वादग्रस्त ठरलेले कारागृह व सुधार सेवा विभागाचे विशेष पोलिस महानिरीक्षक जालिंदर सुपेकर यांची शासनाने मुंबईत होमगार्डच्या उपमहासमादेशकपदी बदली करून ‘डिमाेशन’ केले आहे. मात्र, पत्नीच्या छळप्रकरणी अमरावती मध्यवर्ती कारागृहात बंदिस्त गायकवाड बाप-लेकांना मानसिक त्रास आणि ‘डिमांड’ पूर्ण न करणाऱ्या तुरुंगातील सात जणांचे सुपेकरांनी निलंबन केले होते. त्यामुळे सुपेकरांचे अमरावतीशी ‘फ्रॉड’ कनेक्शन नव्याने समोर आले आहे.

आयपीएस जालिंदर सुपेकर यांच्याकडे नागपूर येथील उपमहानिरीक्षकपदाचा अतिरिक्त कारभार असताना, त्यांनी १९ ऑगस्ट २०२३ रोजी अमरावती कारागृहात ‘अनऑफिशियल’ भेट दिली होती. कारागृहात बंदिस्त असलेल्या पुण्यातील हाय प्रोफाइल गायकवाड बाप-लेकांना तुरुंगाधिकाऱ्यांसमक्ष टार्गेट केले होते. ११०० पेक्षा जास्त कैदी असताना, सुपेकरांनी गायकवाड बाप-लेकांचीच भेट का घेतली, हा आता संशोधनाचा विषय ठरत आहे.

गायकवाडांना येरवड्यातून अमरावतीत का हलविले?
पत्नीच्या छळप्रकरणी पुणे येथील नानासाहेब गायकवाड आणि मुलगा गणेश गायकवाड हे येरवडा कारागृहात बंदिस्त होते. मात्र, या बाप-लेकांची अचानक पुण्याहून अमरावती मध्यवर्ती कारागृहात रवानगी करण्यात आली. हा निर्णय कोणी, कशासाठी घेतला, याची विशेष चौकशी केल्यास मोठा ‘फ्रॉड’ बाहेर आल्याशिवाय राहणार नाही, असे बोलले जात आहे.

या सात जणांचे केले होते निलंबन 
अमरावती मध्यवर्ती कारागृहाचे अतिरिक्त अधीक्षक भारत भोसले, वरिष्ठ तुरुंगाधिकारी कमलाकर मिरासे, तुरुंगाधिकारी राजेंद्र राठोड, वैद्यकीय आराेग्य अधिकारी डॉ. प्रमोद राजतकर, हवालदार उल्हास साखरे, महिला शिपाई सरिता सरोदे, प्रतिनियुक्तीच्या तुरुंगाधिकारी संघमित्रा शेळके यांचा निलंबनात समावेश होता.

"आराेग्यविषयक अहवाल समाधानकारक नसल्याचा ठपका ठेवत २० मार्च २०२४ रोजी माझे निलंबन केले होते. मात्र, त्यानंतर आयपीएस जालिंदर सुपेकर यांना ही चूक लक्षात येताच पुन्हा तीन महिन्यांनी अमरावतीतच रुजू करून घेतले. मला कोणतीही ‘डिमांड’ केली नव्हती."
- डॉ. प्रमोद रोजतकर, वैद्यकीय आरोग्य अधिकारी, नांदुरा.

"नागपूर खंडपीठात रिट याचिका दाखल केली आहे. न्यायालयाने जालिंदर सुपेकर, मुक्ताई साळुंखे आदींना नोटीस बजावली आहे. नानासाहेब गायकवाड यांची वैद्यकीय तपासणीचे कोर्टाचे निर्देश असताना त्याचे पालन केले जात नाही. सुपेकरांनी अमरावती कारागृहात गायकवाड बाप-लेकांशी भेट घेतली तेव्हा साडेतीन तास अंडा बराकमध्ये काय केले होते, हे समोर आले पाहिजे."
- ॲड. निवृत्ती कऱ्हाड, पुणे