"मी कन्व्हर्टेड मुस्लीम.. " कंट्रोल रूमला कॉल करून अमरावती पोलिस आयुक्तालयात दिल्लीसारख्या बाॅम्बस्फोटाची धमकी

शहर पोलिस कंट्रोल रूमला कॉल : कॉलधारकाचे लोकेशन इंदौरला, पीएसआयची टीम रवाना

अमरावती : शहर पोलिस आयुक्तालय परिसरात दिल्लीसारखा बाॅम्बस्फोट करण्याची धमकी शहर पोलिसांना देण्यात आली. २८ नोव्हेंबर रोजी रात्री ८:२० च्या सुमारास शहर पोलिस आयुक्तालयातील कंट्रोल रूममधील लँडलाईन व एका मोबाइल क्रमांकावर ती धमकी देण्यात आली. आपण कन्व्हर्टेड मुस्लीम आहोत, असेही त्या कॉलरने सांगितले. दरम्यान, धमकी देणाऱ्याने आपली ओळख हरीश म्हणून दिली. त्याचे कुटुंबीय रहाटगाव परिसरात राहत असल्याचे उघड झाले आहे. त्या धमकीच्या कॉलमुळे शहर पोलिस अलर्ट झाले आहेत.

दरम्यान, पोलिस नियंत्रण कक्षातील सहायक पोलिस उपनिरीक्षक कमल गणेश लाडवीकर (५३) यांच्या तक्रारीवरून फ्रेजरपुरा पोलिसांनी २९ नोव्हेंबर रोजी पहाटे २:२८च्या सुमारास फोनवरून धमकी दिल्याप्रकरणी त्या मोबाइल क्रमांकधारकाविरुद्ध बीएनएसचे कलम ३५१(३) अन्वये गुन्हा दाखल केला.

दरम्यान, धमकी देणाऱ्याचे लोकेशन मध्यप्रदेशातील इंदौरचे येत असल्याने फ्रेजरपुराचे ठाणेदार रोशन सिरसाट यांनी पोलिस उपनिरीक्षक राहुल महाजन व दोन अंमलदारांचे पथक इंदौरला रवाना केले आहे. त्या मोबाइलधारकाने आयुक्तालयातील वरिष्ठ पोलिस अधिकाऱ्यांना उद्देशून शिवीगाळदेखील केल्याचे एएसआय लाडवीकर यांनी तक्रारीत नमूद केले आहे.