जिल्हाधिकाऱ्यांनी घेतली कोरोना प्रतिबंधक लस

अमरावती : शासकीय तसेच खासगी वैद्यकीय क्षेत्रातील 'फ्रंटलाइन वर्कर्स'ने पुढाकार घेऊन कोरोना प्रतिबंधक लस घ्यावी व लसीकरण मोहीम पुढच्या टप्प्यात जाऊन सर्वांना लसीकरणासाठी सहकार्य करावे, असे आवाहन जिल्हाधिकारी शैलेश नवाल यांनी शनिवारीे केले.

शहरातील डॉ. पंजाबराव देशमुख वैद्यकीय महाविद्यालयातील लसीकरण केंद्रात जाऊन जिल्हाधिकारी नवाल यांनी स्वत: लस घेतली. जिल्हा शल्यचिकित्सक श्यामसुंदर निकम, महाविद्यालयाचे अधिष्ठाता ए.टी. देशमुख, पद्माकर सोमवंशी, जयश्री नांदूरकर, काळे आदी डॉक्टर यावेळी उपस्थित होते.

जिल्ह्यात कोरोनाबाधितांची संख्या वाढत असल्याने मास्कचा वापर व दक्षतेबाबत जोरदार मोहीम हाती घेण्याचे निर्देश जिल्हाधिकारी नवाल यांनी महापालिका व आरोग्य यंत्रणेला दिले आहेत. त्यानुसार जनजागृतीसाठी सोमवारपासून मोहीम राबविण्यात येणार आहे.

जिल्हाधिकाऱ्यांनी शनिवारी सकाळी पीडीएमसीला भेट देऊन पाहणी केली व स्वत: कक्षात जाऊन नोंदणी केल्यानंतर संपूर्ण प्रक्रियेतून जात लस घेतली. जिल्हाधिकाऱ्यांना कोविशील्ड लस देण्यात आल्याचे डॉ. नांदूरकर यांनी सांगितले.

होम आयसोलेशन तसेच खासगी दवाखाने, शासकीय रुग्णालयांनी लक्षणे असलेले व लक्षणे नसलेले रुग्ण गृह विलगीकरणामध्ये ठेवत असताना मोबाईल क्रमांक, पत्ता घेणे व रुग्णांची नोंदणी करणे अत्यावश्यक आहे. त्यांना घराबाहेर न निघणे, मास्क वापरणे, नियमितपणे डॉक्टरांच्या संपर्कात राहणे आदी सूचना देण्याचे आवाहन जिल्हाधिकारी व महापालिका आयुक्तांनी केले आहे.

बॉक्स

- अन्यथा फौजदारी गुन्हे दाखल करणार

होम आयसोलेशन मधील रुग्णांचे नोंदणी ‘होमआयसोलेशन अमरावती’ या संकेत स्थळावर करावी. हे संकेत स्थळ मोबाईल द्वारे नियंत्रित करता येते, होम आयसोलेशनमधील रुग्ण, गृह विलगीकरणाचे नियम कळत नसल्यास रुग्णांविरुद्ध रोग प्रसार व नियंत्रण कायदा अंतर्गत कारवाई करण्यात येईल तसेच रुग्णांनी स्वत:पासून इतरांना कोरोनाची लागण होणार नाही, याबाबत दक्षता घ्यावी, अन्यथा फौजदारी गुन्हे दाखल करण्यात येणार आहेत.

बॉक्स

वैद्यकीय अधिकाऱ्यांना सूचना

सर्व वैद्यकीय अधिकाऱ्यांनी रुग्णांची संपूर्ण नोंदणी करणे आवश्यक आहे, जेणेकरून रुग्ण कुठे आहे, याची माहिती होईल. ७०३०९२२८५१, ७०३०९२२८५१ मोबाईल क्रमांकांवर नोंदणी करू शकणार आहे. रुग्णांचे मोबाईल नंबर घेणे आवश्यक आहे, जेणेकरून रुग्णांशी व्हिडिओ कॉल, फोन कॉल करणे शक्य होईल, असे आवाहनही करण्यात आले आहे.