फोटो - करजगाव ०३ एस
करजगाव : चांदूर बाजार तालुक्यातील करजगाव-बहिरम मार्गाला जोडणारा लगतच्या बोदड गावातील पूल हा अतिशय जीर्ण होत पुरात वाहत गेल्यानंतर सार्वजनिक विभागाने पूर हानी निधीतून सदर पूलासोबत त्याच रस्त्यावरील आणखी दोन पुलांकरिता तीन कोटींचे अंदाजपत्रक मंजूर केले. या पुलांचे काम निकृष्ट होत आहे. मातीमिश्रित रेती व कमी जाडीच्या पोलादाचा वापर होत असल्याने हा पूल तकलादू ठरेल, असा आक्षेप परिसरातील ग्रामस्थ घेत आहेत.
डिसेंबरमध्ये बोदड गावातील पुलाचे व त्यापुढील दोन पुलांचे बांधकाम सुरू करण्यात आले. पुलाच्या बांधकामात त्याच नदीतील मातीमिश्रित रेतीचा वापर करण्यात आला आहे तसेच लोखंडी बार हे ८ व १० एमएमचे बार वापरण्यात आले. उंच व रुंदी अधिक असलेल्या या पुलासाठी सिमेंटदेखील कमी प्रमाणात वापरण्यात आले.
करजगाव-बहिरम मार्गावर मोठ्या प्रमाणात वाहतूक असते. विदर्भातील प्रसिद्ध बहिरम यात्रेला नेणारा हा रस्ता असून, शेतातील साहित्याची वाहतूक याच मार्गाने होते. त्यामुळे जड वाहने मोठ्या प्रमाणात ये-जा करतात. अशात या रस्त्यावरील या पुलाचे निकृष्ट दर्जाचे बांधकाम झाल्यास परिसरातील नागरिकांच्या जीविताला धोका आहे. याच पुलावरून संदीप दांडगे नामक व्यक्ती वाहून गेला होता. बांधकाम निकृष्ट झाल्यास त्याची पुनरावृत्ती होईल का, अशी भीती व्यक्त करण्यात येत आहे.
------------------
कामावर चांगले प्रतीचे साहित्य वापरण्यात आले असून, कन्हानची रेती वापर सुरू आहे. २० मिमी, १६ मिमी, १० मिमी जाडीचे पोलाद आतापर्यंत वापरण्यात आले आहे.
- प्रदीप निर्मळ, कनिष्ठ अभियंता, सार्वजनिक बांधकाम विभाग, चांदूरबाजार