पाचवी ते आठवीचे विद्यार्थी असलेल्या तालुक्यातील शाळांची पहिली घंटा बुधवारी वाजली. कोविड प्रतिबंधात्मक उपाययोजनांचे पालन करीत या सत्रातील वर्ग पहिल्यांदा भरले.शाळेमध्ये प्रवेश करणाऱ्या विद्यार्थ्यांचे तापमान मोजण्यात आले. चांदूर रेल्वे तालुक्यात सर्व खासगी, जिल्हा परिषद व नगर परिषद अशा एकूण ७८, तर जिल्हा परिषदेच्या ४४ शाळा आहेत. ज्यांच्या शाळा अद्याप सुरू झालेल्या नाहीत, अशा लहान मुलांकरिता ‘शाळा विद्यार्थ्यांच्या अंगणात’ हा अनोखा उपक्रम तालुक्यात सुरू केला आहे. यात चांदूर रेल्वे तालुक्यातील गावांमध्ये मुख्य भिंतीवर शैक्षणिक पोस्टर लावून संपूर्ण गावालाच शाळेचे स्वरूप दिले आहे.
------------
पहिल्याच दिवशी अध्यपनाला सुरुवात
तालुक्यातील सर्व पर्यवेक्षीय यंत्रणाद्वारे शाळाभेटीचे नियोजन बुधवारी करण्यात आले. सर्व शाळांमध्ये पहिल्याच दिवशी अध्यापन सुरू करण्यात आले असून, ५० टक्के विद्यार्थी उपस्थित असल्याचे गटशिक्षणाधिकारी मुरलीधर राजनेकर यांनी दिली. तालुक्यातील सर्व शिक्षकांची शाळा सुरू करण्यापूर्वी कोविड चाचणी केली असता, एका जिल्हा परिषद शाळेच्या मुख्याध्यापकाचा अहवाल पॉझिटिव्ह आला असल्याने, ती शाळा सुरू करता आली नसल्याची त्यांनी सांगितले.