अपूर्ण सिंचन विहिरींची कामे संथगतीने

अकोला जिल्ह्यातील सिंचन विहिरींची कामे पूर्ण करण्यासाठी अडीच कोटींचा निधी वितरित.

अकोला : जिल्ह्यातील सिंचन विहिरींची अपूर्ण कामे पूर्ण करण्यासाठी अडीच कोटींचा निधी गेल्या महिन्यात जिल्हा परिषद लघुसिंचन विभागामार्फत जिल्ह्यातील सातही पंचायत समिती स्तरावर वितरित करण्यात आला आहे; मात्र सिंचन विहिरी पूर्ण करण्याची कामे संथगतीने सुरू आहेत. त्यामुळे येत्या महिनाभरात ही कामे पूर्ण होणार की नाही, याबाबत प्रश्नचिन्ह आहे. जवाहर विहीर आणि धडक सिंचन योजनेतील सिंचन विहिरी महात्मा गांधी राष्ट्रीय ग्रामीण रोजगार हमी योजनेत वर्ग करून, सिंचन विहिरींची अपूर्ण कामे पूर्ण करण्याचा निर्णय राज्य शासनामार्फत गेल्या फेब्रुवारीमध्ये घेण्यात आला. सिंचन विहिरींची अपूर्ण कामे पूर्ण करण्यासाठी विहिरींच्या अनुदानातही वाढ करण्यात आली. या पृष्ठभूमीवर अकोला जिल्ह्यातील १ हजार ११६ सिंचन विहिरींची अपूर्ण कामे पूर्ण करण्यासाठी शासनामार्फत २ कोटी ५0 लाखांचा निधी गेल्या मार्च महिन्यात जिल्हाधिकारी कार्यालयाला प्राप्त झाला. हा निधी जिल्हाधिकारी कार्यालयामार्फत गत २८ मार्च रोजी जिल्हा परिषद लघुसिंचन विभागाला वितरित करण्यात आला. २४ एप्रिल रोजी जिल्हा परिषद लघुसिंचन विभागामार्फत हा निधी जिल्ह्यातील सातही पंचायत समिती स्तरावर वितरित करण्यात आला. पंचायत समिती स्तरावरून संबंधित लाभार्थी शेतकर्‍यांना अनुदान वितरित करण्याची प्रक्रिया सुरू आहे. या अनुदानातून सिंचन विहिरींची कामे संबंधित लाभार्थी शेतकर्‍यांकडून केली जात आहेत. कामांची पाहणी आणि मोजमाप पंचायत समिती स्तरावरील अभियंत्यांमार्फत करण्यात येत आहे. झालेल्या कामाच्या आधारे लाभार्थी शेतकर्‍यांना टप्पानिहाय अनुदान वितरित करण्यात येत आहे. शासनाच्या आदेशानुसार सिंचन विहिरींची अपूर्ण कामे येत्या ३0 जूनपर्यंत पूर्ण करावयाची आहेत; मात्र अपूर्ण विहिरी पूर्ण करण्याची कामे संथगतीने सुरू असल्याच्या पृष्ठभूमीवर येत्या महिनाभराच्या कालावधीत जिल्ह्यातील सिंचन विहिरींची अपूर्ण कामे पूर्ण होणार की नाही, याबाबत प्रश्नचिन्ह निर्माण होत आहे.