क्षय व कुष्ठरूग्णांच्या एसटी प्रवास सवलतीस मुदतवाढ

आधार कार्डची अट शिथील; उपचारासाठी प्रवास करताना सवलत.

बुलडाणा : महाराष्ट्र राज्य परिवहन महामंडळाच्या बस प्रवास भाड्यात विविध घटकांप्रमाणेच क्षय व कुष्ठरूग्णांनाही सवलती दिली जाते. राज्य शासनाने १६ जुलै रोजी यासंदर्भात दिलेल्या आदेशानुसार, या सवलतीस मुदतवाढ दिली असून, उपचारासाठी जाणार्‍या क्षयरूग्ण आणि कुष्ठरूग्णांना आधार कार्डाच्या अटीतून शिथिलता देण्यात आली आहे. उपचारासाठी जाण्या-येण्याकरीता क्षय रूग्णांना ५0 टक्के तर कुष्ठरूग्णांना ७५ टक्के सवलत प्रवास भाड्यात दिली जाते. या सवलतीस शासनाने १६ जुलै रोजी मुदतवाढ दिली. ही सवलत घेण्यासाठी रूग्णांकडे शासकीय वैद्यकीय अधिकार्‍याचे प्रमाणपत्र असणे आवश्यक असते. कुष्ठरूग्ण उपचार घेत असल्यास किंवा यापूर्वी उपचार घेतला असल्यास, वैद्यकीय अधिकार्‍याचे तसे प्रमाणपत्र एसटी महामंडळाकडे देणे आवश्यक असते. काही कुष्ठरूग्णांना डोळ्याची किंवा हाताची विकृती असते. अशा रूग्णांसाठी आधार कार्ड दाखविण्याची अट शासनाने शिथील केली आहे. *४ हजार १00 क्षयरोगी, तर ११ हजार ७00 कुष्ठरूग्ण राज्यातील ४ हजार १00 क्षयरोगी आणि ११ हजार ७00 कुष्ठरोगींना वैद्यकीय उपचार घेण्यासाठी जाण्या व येण्याकरीता प्रवास भाड्यात अनुक्रमे ५0 आणि ७५ टक्के सवलत दिली जाणार आहे. यासाठी राज्य शासनाने २0१४-१५ या आर्थिक वर्षात १0 लाख १0 हजार, तर २0१५-१६ या आर्थिक वर्षात १२ लाख १३ हजार रूपयांच्या निधीची तरतूद केली आहे.