मुरलीधर आनंदा बुटे यांचे नुकतेच गावाच्या नाल्याच्या पुरात बुडून निधन झाले. आज पालकमंत्री ना. कडू यांनी त्यांच्या घरी जाऊन भेट घेतली. कुटुंबीयांचे सांत्वन केले. बुटे यांचा मुलगा महेश व मुलगी वैष्णवी असे दोघेच वारस आहेत. त्यांना प्रत्येकी दोन लाख रुपये असे एकूण चार लक्ष रुपयांच्या सानुग्रह अनुदानाचा धनादेश पालकमंत्र्यांनी सुपूर्द केला. या कुटुंबाला अन्य योजनांमधून मदत मिळवून देऊ, तसेच त्यांचे घराचे पूर्णतः नुकसान झाले असून त्यांना घरकुल योजनेचा लाभ मिळवून देऊ. शिवाय मुलगा महेश याला शिक्षणासाठी सर्वतोपरी मदत करू, असे आश्वस्त केले. पनोरी गावच्या नाल्याचे खोलीकरण, तसेच गावच्या रस्त्याचे काम लवकरात लवकर जिल्हा नियोजन समितीच्या निधीतून करण्यात येतील, असेही ना. कडू यांनी सांगितले. यावेळी पंचायत समिती सभापती लताबाई नितोने, उपविभागीय अधिकारी श्रीकांत देशपांडे, जिल्हा नियोजन अधिकारी गिरीश शास्त्री, तहसीलदार निलेश मडके, गटविकास अधिकारी किशोर शिंदे तसेच अन्य अधिकारी, ग्रामस्थ उपस्थित होते.
.......................
पूरग्रस्त गावांनजीक नाल्यांचे खोलीकरण प्राधान्याने
अकोला : जिल्ह्यात जिथे जिथे नाल्याचे पाणी गावात शिरून पुरामुळे नुकसान झाले तेथे नाला खोलीकरण काम जिल्हा नियोजन समितीच्या निधीतून प्राधान्याने करण्यात येईल, असे पालकमंत्री बच्चू कडू यांनी पानेरी येथे बाेलताना सांगितले.
...........................................
बोधचिन्ह स्पर्धेचे आयोजन
अकोला : क्रीडा क्षेत्रातील कामगिरी उंचावणे व दर्जेदार खेळाडू, क्रीडा संधी निर्माण करणे या उद्देशाने शासनाने राज्यात आंतरराष्ट्रीय क्रीडा विद्यापीठ, महाराष्ट्र स्थापन केले आहे. या क्रीडा विद्यापीठाचे बोधचिन्ह ठरविण्यासाठी स्पर्धेचे आयोजन करण्यात आले आहे. या स्पर्धेत अकोला जिल्ह्यातील नागरिकांनी सहभागी व्हावे, असे आवाहन जिल्हा क्रीडा अधिकारी आसाराम जाधव यांनी केले आहे.
..........................