भारिप-बमसंचे आमदार भदे यांच्या घरावर हल्ला!

भारिप-बमसंचे आमदार हरिदास भदे यांच्या घरावर काही युवकांनी हल्ला केला.

अकोला- भारिप-बमसंचे अकोला पूर्व मतदारसंघातील आमदार हरिदास भदे यांच्या घरावर काही युवकांनी हल्ला केला. लोकसभा निवडणुकीचे निकाल लागल्यानंतर काही तासातच हा हल्ला झाला. हल्ला करणारे भारिप-बमसंचेच कार्यकर्ते असल्याचा पोलिसांचा संशय असून, काही कार्यकर्त्यांना चौकशीसाठी सिव्हिल लाईन पोलिस ठाण्यात बोलावण्यात आले होते.
अकोला लोकसभा मतदारसंघाचा निकाल लागल्यानंतर शुक्रवारी सायंकाळी काही युवकांनी आमदार भदे यांच्या घरावर हल्ला करून घराच्या टॉवरसह घरापुढे उभ्या असलेल्या गाडीचा काच फोडला. लोकसभा निवडणुकीत आमदार भदे यांच्या समाजाने भारिपचे नेते ॲड. प्रकाश आंबेडकर यांना मतदान केले नसल्याच्या संशयावरून हा हल्ला करण्यात आला असल्याची चर्चा आहे. हल्ला करणारे युवक हे भारिपच्या युवक आघाडीचे कार्यकर्ते असल्याने काही युवा कार्यकर्त्यांना चौकशीसाठी बोलाविण्यात आले होते. आमदार भदे यांनी घरातीलच भांडण असल्याचे सांगून रात्री उशिरापर्यंत हल्ला प्रकरणात तक्रार दिली नव्हती. पोलिस पुढील तपास करीत आहेत.