दीर्घकाळाच्या विश्रांतीनंतर भंडारदरा आणि मुळा धरणांच्या पाणलोट क्षेत्रात रविवारपासून पावसाने चांगलाच जोर धरला आहे. सोमवारी सकाळी संपलेल्या चोवीस तासांत या मोसमात प्रथमच घाटघर येथे आठ इंच पावसाची नोंद झाली होती. यानंतरही पावसाची संततधार सुरूच आहे. बुधवारी सकाळी संपलेल्या चोवीस तासांत रतनवाडी येथे सहा इंचाहून अधिक १५५ मिमी. पावसाची नोंद झाली, तर पांजरे येथे १२२ मिमी. पावसाची नोंद झाली. त्याखालोखाल घाटघर येथे १२२ मिमी आणि भंडारदरा येथे ११७ मिमी. पाऊस कोसळला.
परिसरातील ओढे, नाले दुथडी भरून वाहू लागले आणि भंडारदरा धरणात नवीन पाण्याची आवकही वाढली. बुधवारी सकाळी संपलेल्या चोवीस तासांत भंडारदरा धरणात ४११ दशलक्ष घनफूट नवीन पाण्याची आवक होत पाणीसाठा ५,४५९ दशलक्ष घनफूट झाला. पावसाळा सुरू होण्यापूर्वी धरणात असलेल्या मुबलक पाणी साठ्यामुळे धरणातील पाणीसाठा ५० टक्क्यांपर्यंत पोहोचला. निळवंडे धरणात १०० दशलक्ष घनफूट नवीन पाण्याची आवक होत पाणीसाठा १ हजार ६०० दशलक्ष घनफूट इतका झाला होता.
................
मुळाच्या प्रवाहात वाढ
मुळा खोऱ्यातही रविवारी सायंकाळपासून पावसाने चांगलाच जोर धरला आहे. या भागातही मुळा नदीच्या प्रवाहात वाढ झाली असून, बुधवारी सकाळी कोतुळजवळील मुळा नदीचा विसर्ग ५ हजार ८२६ क्युसेक इतका होता.
..............
कोथळे तलाव ओव्हरफ्लो
हरिश्चंद्रगडाच्या पर्वत रांगांतही रविवारपासून पावसाने चांगलाच जोर धरला आहे. त्यामुळे या परिसरातील ओढे, नालेही दुथडी भरून वाहू लागले आहेत. त्यामुळे मुळा खोऱ्यातील आंबितनंतरचा कोथळे येथील १८२ दशलक्ष घनफूट क्षमतेचा लघु पाटबंधारे तलाव मंगळवारी रात्री भरून वाहू लागला. त्यातील पाणी आता मुळा पात्रात झेपावू लागले आहे.