संगमनेर : महाराष्ट्र राज्य मार्ग परिवहन महामंडळाच्या बसमधून पूर्वी प्रवास करताना प्रवाशांना वाहक तिकिटे देताना तिकिटांना विशिष्ट पद्धतीने छिद्र पाडून द्यायचे. त्यानंतर इलेक्ट्रॉनिक मशीनद्वारे प्रवाशांना तिकिटे द्यायला सुरुवात झाली. मात्र, इलेक्ट्रॉनिक तिकीट मशीन काही कारणाने बंद पडल्यास वाहकांना पूर्वी सारखीच खटखट करत जुन्या पद्धतीने तिकिटे द्यावी लागतात.
कोरोनाच्या पहिल्या लाटेत लॉकडाऊन करण्यात आला होता. दुसऱ्या लाटेत ‘ब्रेक द चेन’च्या माध्यमातून निर्बंध घालून दिले होते. त्याचा परिणाम संपूर्ण अर्थव्यवस्थेवर झाला. याला महाराष्ट्र राज्य मार्ग परिवहन महामंडळदेखील अपवाद नव्हते. कोरोना काळात महामंडळाला मोठा आर्थिक तोटा सहन करावा लागला. नाशिक-पुणे दोन महानगरांना जोडणारा रस्ता संगमनेर तालुक्यातून जात असल्याने संगमनेर बसस्थानकात प्रवाशांची नेहमीच मोठी वर्दळ असायची. कोरोना येण्याआधी संगमनेर आगाराचे महिन्याचे उत्पन्न साधारण दीड कोटीपर्यंत होते. या आगारात एकूण ५३ बसेस असून त्यात दोन शिवशाही तर दोन सेमी लक्झरी बसेस आहेत. सहा मालवाहतूक ट्रक आहेत.
बसमधून प्रवास करणाऱ्या प्रवाशांना तिकिटे देण्यासाठी संगमनेर आगारात १२६ इलेक्ट्रॉनिक मशीन उपलब्ध आहेत. त्यापैकी एकही मशिन बंद नसून सर्व मशीन सुस्थितीत असल्याचे आगारप्रमुख निलेश करंजकर यांनी सांगितले. मशीन चार्ज करण्यासाठी स्थानकात विशिष्ट सोय करण्यात आली आहे. वाहकांना दिल्या गेलेल्या मशीनमध्ये काही बिघाड झाल्यास ते दुरुस्त करण्यासाठी मशीन पुरविलेल्या कंपनीची व्यक्ती पूर्णवेळ उपलब्ध असते. मशीन बिघडल्यास पर्यायी मशीन वाहकांना देण्यात येते. प्रवासात कधी मशीन बिघडल्यास वाहक प्रवाशांना पूर्वी दिली जाणारी तिकिटे देतात. ती तिकिटे कायमस्वरूपी बसमध्ये असतात, असेही करंजकर यांनी सांगितले.
---------------
कोरोनामुळे उत्पन्न घटले
२०१९ साली संगमनेर आगारात ७६ बसेस होत्या. सध्या आगारात ५३ बसेस आहेत. कोरोनाच्या संसर्गामुळे शाळा, महाविद्यालये बंद असल्याने शालेय तसेच ग्रामीण भागातील बहुतांशी फेऱ्या या बंद आहेत. मध्यम, लांब पल्ल्याच्या बसेस सुरू आहेत. कोरोनामुळे उत्पन्न घटून ते निम्म्यावर आले आहे. दररोज तीन लाख रुपये उत्पन्न सध्या मिळत असल्याचे आगारप्रमुख निलेश करंजकर यांनी सांगितले.
-----------
जुळवाजुळव करण्यात वेळ जातो
प्रवाशांना तिकिटे देण्यासाठी इलेक्ट्रॉनिक मशीन आल्याने वाहकांचे काम सोपे झाले. इलेक्ट्रॉनिक मशीनमध्ये एका बटनावर रिपोर्ट मिळतो. मात्र, प्रवासादरम्यान या मशीनमध्ये बिघाड झाल्यास वाहकांना जुन्या पद्धतीने प्रवाशांना तिकिटे द्यावी लागतात. त्यामुळे आकड्यांची जुळवाजुळव करण्यात काही वेळ जातो.
-------------
महाराष्ट्र राज्य मार्ग परिवहन महामंडळात सेवेत असलेले अधिकारी, कर्मचारी, वाहक-चालक यांचे पगाराचे खाते स्टेट बँक ऑफ इंडियामध्ये आहेत. दर महिन्याच्या सात तारखेला पगार होतो. मात्र, सध्या पगार हे थोडे उशिराने का होईना, परंतु पूर्ण मिळत आहेत.
-निलेश करंजकर, आगारप्रमुख, संगमनेर