बी-बियाणे, खतामध्ये शेतकऱ्यांची लूट थांबवा

प्रहार संघटनेच्या पदाधिकाऱ्यांनी मंगळवारी जिल्हा कृषी अधिकाऱ्यांची भेट घेऊन त्यांना सविस्तर निवेदन दिले. जिल्ह्यात मोठ्या प्रमाणात युरिया खताची टंचाई आहे. तसेच त्याचा काळाबाजार आहे सुरू आहे. त्वरित हे नियोजन करून शेतकऱ्यांना खत उपलब्ध करून द्यावे. ज्या शेतकऱ्याचे शेततळ्यातील अनुदान मागील दीड वर्षांपासून रखडले आहे ते मिळावे, नवीन ठिबकचे सुद्धा अनुदान मिळत नाही त्याबद्दल लवकरात लवकर मार्ग काढावा. युरिया सोबत कोणत्याही इतर खतांची सक्ती करू नये, जिल्ह्यात कांदाचाळीचे लक्षांक वाढवून देऊन मागेल त्याला कांदा चाळ योजना सुरू करावी. गोडाऊन समोर व दुकानासमोर खताचे दर फलक व शिल्लक साठा याचा फलक लावण्यात यावा, खतसाठा आल्यानंतर त्या विभागाचे कृषी सहाय्यक यांनी त्या ठिकाणी उपस्थित राहावे. दुकानदार दोषी आढळल्यास दुकानदार व संबंधित कंपनीवर गुन्हे दाखल करावेत, फळबाग योजनेच्या इस्टिमेटसाठी खासगी ऐवजी शासनाकडून नियुक्त अभियंत्याने कार्यवाही करावी, शेती अवजारासाठी जे अनुदान दिले जाते त्यातही लकी ड्रॉ पद्धत शेतकऱ्यांना न कळणारी आहे ती बदलावी, या मागण्यांवर त्वरित विचार झाला नाही तर मंत्री बच्चूभाऊ कडू यांच्या आदेशानुसार, तसेच हभप अजय महाराज बारस्कर व राज्य प्रवक्ते संतोष पवार यांच्या मार्गदर्शनाखाली प्रहार जनशक्ती पक्ष शेतकऱ्यांना घेऊन आंदोलन करेल, असे निवेदनात म्हटले आहे.

यावेळी संघटनेचे जिल्हाध्यक्ष विनोदसिंग परदेशी, जिल्हा सचिव प्रकाश बेरड, उपाध्यक्ष देविदास येवले, नगर तालुकाध्यक्ष भगवान भोगाडे, शेतकरी बाबासाहेब दारकुंडे, संजय साळवे, दत्तू वाळके, नंदू म्हस्के, चंदू म्हस्के, विकास गटकळ, भरत लवांडे, नितीन पवार, तेजस गाढवे, कार्याध्यक्ष मालोजी शिकारे, संजय बामदले, संजय जयसिंग, शामराव लोखंडे, सुरेश सुपेकर आदी उपस्थित होते.

-----------

फोटो आहे

०९प्रहार निवेदन

बी बियाणे व खतांचा पुरवठा सुरळीत करून शेतकऱ्यांना न्याय द्यावा या बाबतचे निवेदन प्रहार जनशक्ती पक्षाच्या वतीने जिल्हा कृषी अधिकाऱ्यांना देण्यात आले.