आतापर्यंत जिल्ह्यात सरासरी ५६ मि़ मी़ पाऊस

अहमदनगर: गेल्या एक महिन्यापासून पावसाने ताण दिला होता़ जून पूर्णपणे कोरडा गेला़ त्यामुळे जिल्ह्यात पाणी टंचाईने डोके वर काढले आहे़ सोसाट्याचा वारा वाहू लागल्याने सर्वांनाच देव आठवू लागले होते़ सामान्यांसह सरकारी यंत्रणाही धास्तावली होती़ मात्र उशिरा का होईना, पण नगर शहरासह जिल्ह्यात हलक्या सरींनी पावसाचे आगमन झाले असून, बुधवारी जिल्ह्यात सरासरी ४ मि़ मी़ पावसाची नोंद झाली आहे़
सर्वसाधारणपणे नगर जिल्ह्यात ७ जूनला मान्सूनचा पाऊस पडतो़ मान्सून वेळवरच बरसणार असल्याचा अंदाजही हवामान खात्याकडून वर्तविण्यात आला होता़ मात्र हवामान खात्याचे अंदाज मोडीत काढत जूनमध्ये मान्सून पडलाच नाही़ जून कोरडा गेल्याने चिंता वाढली़ जुलैच्या पहिल्या आठवड्यातही पावसाचा पत्ता नव्हता़ परिणामी धरणांत नवीन पाणी आलेच नाही़ जिल्ह्याला वरदान ठरलेल्या मुळा व भंडारदरा धरणाने तळ गाठला आहे़ धरणांत नवीन पाण्याची आवक होईल, असा पाऊस झाला नाही़ त्यामुळे धरणांची स्थिती जैसे थे आहे़ परंतु गेल्या दोन दिवसांपासून वातावरणात बदल झाला असून, पावसाचे धिम्या गतीने आगमन झाले़ उशिरा का होईना, पण पावसाला सुरुवात झाली आहे़
पावसाची झड सुरू असून, जिल्ह्यात सरासरी ४़ ३० मि़ मी़ पाऊस झाला आहे़ त्यात सर्वाधिक पावसाची नोंद नेवासा तालुक्यात झाली आहे़
शहरात दुपारनंतर पावसाला सुरुवात झाली़ आकाशात काळे ढग दाटून आले़ दुपारनंतर झालेल्या पावसाने सखल भागात पाणी साचले होते़ राहुरी तालुक्यातही हलक्या स्वरुपाचा पाऊस पडला़ तर श्रीगोंदा तालुक्यात ९ मि़ मी़ पाऊस पडला आहे़ इतर ठिकाणीही रिमझिम पाऊस पडला़
जोराचा नसला तरी भिज पाऊस सर्वत्र पडत आहे़ आणखी पाऊस होईल, या अपेक्षेने पेरणीची लगबग सुरू झाली आहे़ भिज पाऊस झाल्याने उत्तर नगर जिल्ह्यात कपाशीच्या लागवडीला सुरुवात झाली असून, बियाण्यांसाठी शेतकऱ्यांनी गर्दी केली आहे़ मात्र जोरदार पावसाची अजूनही बळीराजाला प्रतीक्षा आहे़ (प्रतिनिधी)