---------
लोकमत न्यूज नेटवर्क
अहमदनगर : कोरोनावरील लस घेण्याबाबत गरोदर मातांमध्ये संभ्रम असून, गेल्या आठ दिवसांत केवळ ५० महिलांनीच फक्त लस घेतली आहे. दररोज साधारण एक किंवा दोन महिला लस घेण्यासाठी येत असल्याने त्यांनाही लस देणे शक्य होत नसल्याचे प्रशासनाकडून सांगण्यात आले.
महापालिकेच्या कै. बाळासाहेब देशपांडे रुग्णालयात गर्भवती महिलांना कोरोनावरील लस देण्यात येत आहे. गेल्या सोमवारपासून गर्भवती महिलांसाठी लस उपलब्ध करून देण्यात आली आहे. पहिल्या दिवशी २० गर्भवती महिलांना लस देण्यात आली. त्यानंतर लस घेणाऱ्या गर्भवती महिलांची संख्या घटली असून, लसीकरण मोहीम थंडावली आहे. रुग्णालयात नियमित तपासणीसाठी येणाऱ्या महिलांचे समुपदेशन करण्यासाठी दोन आरोग्यसेविकांची महापालिकेने नियुक्ती केली आहे; परंतु लस घेण्यास गर्भवती महिलांकडून नकार दिला जातो. एक किंवा दोन महिला लस घेण्यास तयार झाल्या तरी त्यांना लस देता येत नाही. कारण एकावेळी किमान १० डोस द्यावे लागतात. त्यापेक्षा कमी संख्या असल्यास डोस वाया जातात, असे आरोग्य विभागाचे म्हणणे आहे.
गर्भवती महिलांना लस देण्याचा शासनाचा आदेश आहे. गर्भवती महिलांना रांगेत उभे राहावे लागू नये, यासाठी पालिकेने स्वतंत्र रुग्णालयात लस देण्याची सोय केली; परंतु गर्भवती महिलांनीच लसीकरणाकडे पाठ फिरविल्याने प्रशासनाचाही नाइलाज झाला आहे.
....
गर्भवती महिलांनी का घ्यावी लस?
आतापर्यंतच्या अनुभवावरून असे लक्षात आले आहे की, गर्भवती स्त्रियांमध्ये कोविडचा संसर्ग झाल्यास त्यांना अतिशय तीव्र आजार होण्याची शक्यता जास्त असते. तसेच गर्भवती स्त्रियांमध्ये कोविडचा संसर्ग झाल्यास कमी दिवसाच्या बाळाचा जन्म होण्याची तसेच बाळाला इतर त्रास होण्याची जास्त शक्यता असते. त्यामुळे गर्भवती स्त्रियांनी कोरोनाचा संसर्ग होऊ नये, याची काळजी घ्यावी. कोरोना लसीकरणामुळे होणारा दुष्परिणाम हे कोविड लसीकरणापेक्षा खूपच कमी तीव्रतेचे असतात, असे डॉ. सचिन वाहाडणे यांनी सांगितले.
......
एकूण लसीकरण
१ लाख २२ हजार ७८१
पहिला डोस- ८६ हजार ४२९
दुसरा डोस- ३७ हजार ८८९
.....