राजूर : कोसळत असलेल्या धो-धो पावसाने नवलाईने नटलेला हिरवागार निसर्ग. तुडुंब भरलेली भात खाचरे. दुथडी भरून वाहणारे ओढे नाले. ओल्याचिंब झालेल्या डोंगररांगा. परिसरातील सह्याद्रीच्या पर्वतरांगांच्या गिरी शिखरांवरून उड्या मारत पांढरेशुभ्र धबधबे कोसळू लागल्याने अहमदनगर जिल्ह्याची पर्यटन पंढरी म्हणून ओळखल्या जाणाऱ्या अकोले तालुक्यातील भंडारदरा धरणाच्या पाणलोट क्षेत्रात जलोत्सव सुरू झाला आहे.
जिल्ह्याची चेरापुंजी म्हणून ओळख असणाऱ्या घाटघर, रतनवाडी, पांजरे या परिसरात यावर्षी पावसाचे लवकर आगमन झाले. रविवारपासून या परिसरावर वरुण राजाची कृपा झाली आणि घाटघर, रतनवाडी, पांजरे येथे धो धो पाऊस कोसळू लागला. अवघ्या आठ-दहा तासांत तब्बल आठ इंचाहून अधिक पावसाची नोंद झाली. सुरू झालेल्या पावसाचा जोर अद्यापही कायम आहे. डोंगरांच्या टोकांवरून छोटे-मोठे प्रपात जोषात कोसळू लागले आहेत. जोरदार वाऱ्यांमुळे डोंगराच्या शिखराकडे पुन्हा फिरकी घेणारे रिवर्स फॉल लक्ष वेधून घेत आहे. याबरोबरच भरभरून वाहू लागलेल्या ओढ्या नाल्यांमुळे परिसरच जलमय झाला आहे.
भंडारदरा धरणाच्या रिंगरोडला सुरुवात होताच येथील जलोत्सव दृष्टिक्षेपात येण्यास सुरुवात होते. उंच डोंगरावरून वेगवेगळी नावे ठेवलेले धबधबे डोळ्यांचे पारणे फेडल्याशिवाय राहत नाहीत. धुक्यात हरवलेला घाटघरचा कोकण कडा, कड्या खालून येणारे दाट धुके, त्यापाठोपाठ येणारा सुखद वारा आणि नंतर काही वेळात टपोऱ्या थेंबाने कोसळणारा पाऊस उल्हास निर्माण करीत असतो. एकूण येथील निसर्ग खुलला असून, आता हा जलोत्सवाचा आविष्कार पाहण्यासाठी पर्यटकांची गर्दी होऊ लागली आहे.
...................
२४ तासांत ८५१ दशलक्ष घनफुटे पाण्याची आवक
मुळा भंडारदरा धरणांच्या पाणलोट क्षेत्रात मुसळधार पाऊस कोसळला. पाणलोटातील घाटघर, रतनवाडी आणि पांजरे येथे आठ इंचाहून अधिक पाऊस पडला, तर भंडारदरा येथेही सुमारे आठ इंच पाऊस पडला. यामुळे चोवीस तासांत भंडारदरा धरणात तब्बल ८५१ दशलक्ष घनफूट नवीन पाण्याची आवक होत पाणीसाठा सकाळी सहा वाजता ६ हजार २३९ दशलक्ष घनफूट इतका झाला होता. कळसुबाई परिसरातून वाहणाऱ्या कृष्णावंती नदीच्या विसर्गात मोठी वाढ झाल्याने वाकी येथील ११२ दशलक्ष घनफूट क्षमतेचा पाझर तलाव पूर्ण क्षमतेने भरून ओसंडून वाहत असून, या तलावावरून ११२ क्युसेकने पाणी पुढे झेपावत आहे.
..................
गुरुवारच्या चोवीस तासांत भंडारदरा पाणलोट क्षेत्रात नोंदला गेलेला पाऊस. (मिमीमध्ये)
घाटघर २१२
पांजरे २१०
रतनवाडी २०७
भंडारदरा १९०
वाकी१६०मिमी