-------------
लोकमत न्यूज नेटवर्क
अहमदनगर: कोरोना प्रतिबंधक लसीसाठी नागरिकांना अक्षरश: पायपीट करावी लागत आहे. पहिला डोस घेतलेल्या जिल्ह्यातील ८ लाख ८५ हजार नागरिकांना दुसरा डोस मिळेना. तसेच पहिला डोस घेण्यासाठीही गर्दी होते आहे. गेल्या सात महिन्यांत ११ लाख नागरिकांना लस देण्यात आली असून,लसीकरणाची गती अशीच राहिल्यास संपूर्ण लसीकरण होण्यास पुढील दोन वर्षे लागतील, असा अंदाज आहे. त्यामुळे तिसरी लाट रोखायची कशी असा प्रश्न नागरिकच उपस्थित करू लागले आहेत.
जिल्ह्यातील ३८ लाख नागरिकांना कोरोना प्रतिबंधक लस दिली जाणार आहे. आरोग्य यंत्रणेने जानेवारीपासून लसीकरणाला सुरुवात केली. लसीकरण मोहीम सुरू होऊन सात महिन्यांचा कालावधी उलटून गेला. मात्र लसीकरण झालेल्या नागरिकांची आकडेवारी तळालाच आहे. कोरोनाची दुसरी लाट ओसरलेली नाही. तिसरी लाट येण्याची शक्यता वर्तविली जात आहे. परंतु, केंद्राकडून मुबलक लस उपलब्ध होत नाही. मागणीच्या प्रमाणात खूपच कमी प्रमाणात लस उपलब्ध होत असल्याने आठवड्यातील काही दिवस लसीकरणच बंद ठेवण्याची वेळ जिल्हा परिषद, नगरपालिका आणि महापालिकेच्या आरोग्य यंत्रणेवर येत आहे. लस उपलब्ध होत नसल्याने जिल्ह्यातील आरोग्य यंत्रणेचीही अडचण झाली असून, त्यांना नागरिकांच्या रोषाला सामोरे जावे लागत आहे.
....
१६० केंद्रांवर लसीकरण
शहरासह जिल्ह्यातील १६० लसीकरण केंद्रांवर कोरोना प्रतिबंधक लस देण्यात येते. जिल्हा परिषदेसह नगरपालिका आणि महापालिकांकडून लसीकरणाचे नियोजन करण्यात येत आहे. लस देण्यासाठी आरोग्य कर्मचाऱ्यांची भरती करण्यात आलेली आहे. लसीकरणात कोणताही अडथळा येणार नाही, याची काळजी प्रशासनाकडून घेतली जात आहे. परंतु, पुरेशा प्रमाणात लस उपलब्ध होत नाही. दररोज ५ ते ६ हजार डोस मिळतात. हा आकडा जरी मोठा दिसत असला तरी एका केंद्रावर साधारणपणे २० ते ३० डोस उपलब्ध होतात. तुलनेत लस घेण्यासाठी येणाऱ्यांची संख्या काही ५ ते १० पट आहे. त्यामुळे लसीकरण केंद्रांवर गोंधळाची परिस्थिती निर्माण होत आहे.
.....
आतापर्यंत झालेले लसीकरण
पहिला डोस
हेल्थलाईन वर्कर- ४४ हजार ८७७
फ्रंटलाईन वर्कर- ५९ हजार १०२
१८ ते ४५- २ लाख ५ हजार ७०९
४५ ते ६०- २ लाख ९३ हजार ४७६
६० पेक्षा अधिक- २ लाख ८२ हजार १२३
.....
दुसरा डोस
हेल्थलाईन वर्कर- ३४ हजार ७७१
फ्रंटलाईन वर्कर- २७ हजार ३३१
१८ ते ४५- १७ हजार ४१८
४५ ते ६०- १ लाख ६ हजार २२३
६० पेक्षा अधिक- १ लाख २५ हजार ५०५
....
हा तर त्रास देण्याचाच प्रकार
शहरासह जिल्ह्यातील नागरिकांना वेळेवर लस मिळत नसल्याने हा तर त्रास देण्याचाच प्रकार असल्याची प्रतिक्रिया उमटत आहे. सरकारकडून लसीकरणाचा केवळ गाजावाजा केला जात असून, प्रत्यक्षात तीन महिने उलटूनही नागरिकांना वाट पाहावी लागत असल्याने संताप व्यक्त केला जात आहे.
...
केंद्रांबाहेर पहाटेपासूनच रांगा
नगर शहरातील लसीकरण केंद्रांवर पहाटेपासूनच नागरिक लस घेण्यासाठी रांगा लावत आहेत. परंतु, पुरेशा प्रमाणात लस उपलब्ध होत नाही. आरोग्य केंद्रातून टोकन दिले जाते. परंतु, नंबर येईपर्यंत लस संपलेली असते. त्यामुळे नागरिकांना लस न घेता परत जावे लागत असल्याने नाराजीचा सूर आहे.
...